陸羽仁 - 新股出籠要頂高

美股上日創新高，股神巴菲特在加州舉行的一個會議上話，佢一路講緊的時候，旗下公司巴郡正在買美股，股神咁講刺激了美股投資氣氛。雖然內地股市昨日回軟，港股依然造好，恒指跟隨外圍高開逾220點後，升幅一度收窄至只有8 4點，但在21000點附近已見支持。朝早11時許，期指10分鐘內大幅抽升200點，帶動恒指亦跳升近220點至21200點上方。午後又跟內地股市回一回，但之後發力再上，以全日最高位收市，成功突破近期阻力21300點水平。

恒指收報21402點，大漲536點或2.6%，創埋今年高位；期指收報21437點，漲6 13點，比現貨高水34點，成交79736張。國企指數升幅更勁，收報12525點，勁升36 9點或3%。紅籌指數跑輸大市，收報4042點，升70點或1.8%。大市成交增加至699億元。


注資市仲有跟尾

重磅股控(005)昨日表現強勁，成為推動大市上升的主要動力。瑞信將控目標價由690便士調高至720便士，約92港元，評級維持「跑贏大市」。瑞信看好控資產負債表穩健，6月底止一級資本充足比率8.8%，貸存比率由去年底83.6%改善至79.5%。估計控2010年稅前盈利約190億美元，高過市場共識約30%。加上市傳控及中信泰富(267)已屬意聘用中信證券為其A股IPO承銷商及保薦人，更炒上A股概念。「大笨象」昨日高開1.2%後，股價逐步攀升，最後以全日最高位收市，收報87.4元，漲3.1%，係11個月以來最高位。中移動(941)走勢較反覆，但亦以全日最高位收市，收報78元，漲2%，略跑輸大市。

昨日個市有兩段急升，第一段是上午11點後，第二段是下午三點後，兩個時間都係內地收市之後，由於內地股市腳軟，拖住港股，但在上午和下午內地股市一休市，港股就爆上，可見港股都係想升。

三隻新股國藥(1099)、中冶(1618)和利郎(1234)同時截飛，市場消息話三隻股合共凍結資金7000億以上，搞到金管局要兩度注資入銀行體系，於前晚紐約時段向巿場注資15.5億元後，金管局昨日下午再向銀行體系注資31億元。中環茶友話，資金流入逼令金管局接美元沽港元注資入銀行體系，按以往經驗，呢市仲有得升。

今次三隻新股中，以國藥最厲害，凍資4900億，有望成為歷來凍資第二多的股票，中冶亦凍資2000億。早前有個中環茶友講起一個陰謀論，話9月個市唔衰得去邊，因為幾大投行有大把新股要推出，佢想個場旺，方便去貨，畢竟搞新股上市佢可以賺幾浸錢，單單係包銷佣金那一筆都好和味，佢今年派幾多花紅，都睇呢一兩個月新股去得順唔順，所以有幾間大行睇場，個市插唔到去邊，如果夾到氣氛，隨時頂個市上去。

我當時覺得呢種分析有點兒過份陰謀論，聽完就算，但睇番呢排走勢，又真係幾似，大市跌兩跌就彈，好似跌唔到落去咁。未來兩個星期仲有8隻新股要上，其中恒盛地產、永利賭場都有番咁上下大，再遲仲有金沙和恒大地產要上，唔頂住個市去唔到貨。所以唔係話股市升得多唔會調整，但會維持一定氣氛，跌多少少又會彈。


認全通飲餐茶

講開新股隻中國全通(633)昨日首日掛牌，開市報1.73元，較招股價1.6元高出8.13%，盤中曾高見1.96元，收報1.8元，較招股價高12.5%，成交金額8.3億元。資訊通信應用供應商中國全通，公開發售部份超額認購412倍，雖然最後只升得12%，一手2000股唔計成本賺4舊幾水，都夠飲番餐茶。

隻殯儀股中國生命(8296)昨日繼續回吐，雖然開市無耐急抽上3.59元，令早一日在3.1元止蝕沽貨的經紀張有後悔，但佢好快就證明自己係啦，因為隻跟住就拾級而下，收2.43元，再度勁瀉21.6%，星期二唔走真係輸多，如果散戶在星期三高位4.24元追貨，兩日夾埋唔見43%，真係會蝕入肉，無止蝕就唯有焗守。佢昨日又成交2.4億股，隻股總股數只有6億股，大股東劉添財了51% ，即係街貨只有2.9億股，但連續四日每日都有2億幾、3億股成交，即係話每日街貨都轉一手，成交大到好誇張囉。中國生命係咁跌，跟炒的相關概念股亦跟隨下瀉，投資廣東墓園業務的勤達(1172)及北海集團(701)雙雙挫7.8%及11.1%，難道真係「走得摩，無鼻哥」？