投資的天空：捨難取易先股後樓

上周五中央公佈放寬 QFII投資上限至 10億美元，亦研究可否准許 QFII機構轉讓投資餘額，希望能夠充份利用投資額度，但「好」消息是否真係好，還是要取決於市場反應。筆者習慣多睇幾日，所以昨日如言將 19400水平買入的貨先行套利，雖然下午港股在 A股收市後上升，但筆者戒心未除，一於繼續持有手上股票，再升先算。筆者唔係睇淡，但升咗咁多，寧願候低再買，就算從此上升，不過賺少些而已。周末筆者收到讀者來信，問士佳看好股市表現，咁樓市又如何？講到樓，筆者並非專家，加上本報高手如雲，士佳實在唔敢班門弄斧。同樣問題，學員在課堂上亦有提及，過去幾個月，股市勁揚會帶動樓市上升，屬意料之內，但升得那麼急，着實叫人有點意外。

筆者以前曾經在電視節目上說，如果以失業率代表經濟，以中原城市領先指數（ CCL）代表樓價，就可以發現樓市與經濟關係密切。雖然金融海嘯之後，經濟情況逐步好轉，股市樓市都急升，但近兩個月失業率只是持平而已，樓市比股市更跟隨經濟周期，就業數據未見大幅好轉，可見資金推動在今次樓市升浪中佔了相當的成份。近日報章都在講樓市點好點好，如果過去幾個月買了樓，相信所賺唔會比投資股市為少，但近日連股市都嚷着要回歸基本步，筆者就唔敢貿然出擊。筆者一向喜歡炒股多於炒樓，原因在於樓市交易費用較高，而且十分考眼光，同一間公司，一股就是一股，但同一個屋苑，唔同單位價錢就截然不同，加上樓宇買賣的流動性遠較股票為低，所以除非是特定時候，升勢確認，否則筆者自己都係炒股不炒樓。其實現在多人買樓，自然升得多，但他日市況趨淡，一個人沽，已經代表了其餘單位的估值，今日價格未必就代表市場有相應的購買力，所以雖然輿論將樓市講得好，筆者都會覺得心動，但既然經濟面仍未完全確認，加上今次牛市與 2000年科網牛市類似，當時股有股升，樓有樓呆，現在未必一定歷史重演，但資金先炒易後炒難（ 2007-2008年正是如此），筆者還是傾向在股市之中搵食，多等一陣才決定是否買樓。張士佳　華富嘉洛證券投資服務部董事