陸羽仁 - 明鬆暗鬆淡友即鬆

早幾日話阿爺見到股市跌頂唔順，高唱「維穩、維穩、維穩」，話口未完，阿爺就口術、手術出齊，先把內地股市夾高，觸發上周五港股大夾倉事件。

上星期五港股的升市又真係幾戲劇性，話說當天成日都係悶悶，上晝跌完又彈，但升又升得唔多，上落200幾點，到下午3點眼見內地個市都收埋，上海A股都只係升得17點，升幅得半個巴仙，炒友心諗當日都差不多可以收工，點知個市3點過後馬上急抽，第一波1分鐘左右就抽200幾點，一舉升穿20000點大關，之後略為回未夠100點，又再向上抽多300幾點，升到20300點樓上，就係5分鐘已經抽升500點。最後恒指升到尾，升556點，收20318點，升幅2.8%，期指更由大低水轉高水，收20379點，升809點，大市成交升至760億元。

當上周五3點個市開始爆升時，市場蒙查查唔知乜事，睇新聞只見話內地宣佈放寬QFII(合資格境外機構投資者)的投資額度，將單家外資機構申請額度上限由8 億美元增至10億美元；並將養老基金、保險基金及開放式中國基金的QFII投資本金鎖定期由1年縮短至3個月。


放直通車美麗誤會

好多經紀睇到呢條消息，以為係放寬港股直通車，但正如中環茶友所言，QFII 唔同QDII(合資格內地投資者)，QFII係指外地機構投資到內地A股市場，唔係指QDI I即內地機構投資到海外市場，所以將QFII單個機構的申請投資額度上限加2億美元至10億美元，只係放多錢入內地投資，唔係內地放錢到香港投資。茶友話，阿爺在國慶前本來已經要維持內地股市穩定，?家新疆咁亂，維族搵針拮漢族搞到漢人大示威，阿爺更是穩定壓倒一切，金融官員自然要穩住股市，搞好氣氛，唔好為最高領導人添煩添亂，所以支持內地股市的政策盡出，放寬QFII額度就係增加資金流入內地股市的招數，這種時候一定唔會搞甚麼港股直通車或者放鬆QDII，因為這樣等如放錢出外地，大陸股市豈不是會仲差，阿爺點會在大陸股市未跌定時搞咁？

好啦，問題啦，既然QFII和放水到香港無關，咁點解港股當日在幾分鐘抽500點，仲反覆造好直到收市？要講QFII和香港的關係，或者可以咁講，外匯管理局公佈消息時內地已收市，A股想升都無得升，但預計這個消息會大大利好內地股市，而A股上升會刺激H股和其他港股造好，都係對香港利好的消息。有包拗頸之人就會咁講，?家係QFII放多25%咁大把，在內地市場只是九牛一毛，唔使咁大反應，況且早幾日上證綜指大升148點時，港股只係跌少，唔係跟足內地去升，咁見到內地的利好消息港股使唔使咁大反應呀？


借機發難大夾淡倉

炒股要信市場，股市升跌總有原因，無話合唔合理，不過港股上星五咁短時間升得咁急，而且到收市都無回落，就唔似係長線投資者的行為，中環茶友估計，幾分鐘升500點，當中有大量淡友已經止蝕打靶，首先20000點已是重要心理關口，而今次急升連10線和50日線都升穿埋，好多技術派在呢位置擺止蝕盤，一到位止蝕買盤就湧出來，令指數係咁谷上去。不過正常計，殺穿大位逼淡友止蝕後，指數會有明顯回吐，但當日尾市特別係期指在現貨收市後仍抽升，只有兩種可能，第一是大市抽升吸引大量實質買盤入市，買唔切現貨唯有補番期指，第二是好友大夾倉，根本唔俾個市回讓淡友有位氣，實行夾到尾夾到淡友投降為止。今次抽升夾倉味道幾濃，若然如此，除時今天開市還會夾。

呢一排個市出奇地呆，好多時一日都只得100幾、200點波動，期指好多時亦出現停住唔郁的唔正常情況，我一直都擔心這只是假象，實質是山雨欲來，大戶只是等機會出手，唔知佢想夾升還是急插而已。一般智慧「十個牛皮九個淡」，所以散戶造淡居多，結果積唔少淡倉，大戶就借內地消息來一個大夾倉，個市發一發癲，大戶走一轉都執千幾點矣。

話番轉頭，阿爺咁樣不斷出招，淡友唔鬆人又的確有風險，香港唔夾，內地都可能會夾。內地早前的情況，就如金融界高人咁講，係「明鬆暗緊」，管理層口講堅持適度寬鬆的貨幣政策不變，但實際上卻要控制銀行放貸，又放出大量新股在市場上吸取資金，令股市投資者腳軟，內地股市急促回吐。


空群出動引資救市

阿爺見股市跌得太急，六十周年國慶又快到，就顯出有些心急了，呢幾日接連出招。第一，中國銀監會早前原本表示，要內地銀行相互持有的次級債務資本工具從附屬資本中扣減，此舉會令銀行的資本馬上減少，直接影響銀行的借貸能力，不過銀監會最新的說法是研究「分年」扣減，不會在短時間內集中要求銀行扣減相互持有的次級債，這將大大紓緩銀行增加資本、減少借貸的壓力。

第二，國家發改委日前話，已將《關於進一步鼓勵和促進民間投資的若干意見》(即鼓勵民間投資20條)遞交國務院。呢「20條」擴大對民間資本可以投資的範圍，包括基礎產業、基礎設施、金融保險、文教生和公共服務五大領域。包括金融保險等五大行業過去是國企的壟斷王國，如今研究容許民間資本進入，將造成這些行業的投資熱潮，即係話將來唔單止靠阿爺投資，亦刺激民間資金在經濟領域扮演更重要角色，成為推動經濟發展的一大動力。

第三，中國證監會正加快放行新基金出籠，若股市繼續唔掂，相信會減慢放行巨型公司上市。

再加埋外匯管理局放寬QFII的投資額度，可以話發改委、證監會、銀監會、外管局總動員去維穩護市。可以想像，內地政策正從「明鬆實緊」向「明鬆實鬆」的方向挪移，起碼鬆到頂住股市唔好再跌先至算。

你鍾意又好，唔鍾意又好，內地股市就係政策市，升得太急阿爺會出聲，唔掂就出埋手，但跌得太多又係一樣，我估計阿爺咁搞，會為A股形成一個政策底，假設原本內地股市未調整完畢，上證綜指星期一跌到2667點低位未係呢次調整的真底，但中央咁出招法，恐怕會加速呢次調整的底部出現，以後反彈完即使要再回落，恐怕也未必咁易插穿2667點這個底，可以想像再有急跌時，阿爺可能預備了更猛的救市特效藥要出籠，由於內地基本上係封閉市場，資金供應主要由阿爺操控，佢咁積極調控，應可控住股市的跌勢。

港股走勢肯定受內地股市影響，如果你睇睇恒指、上證綜指和杜指一年走勢比較圖，就會發覺過去港股和美股走勢貼近一點，但自5月打後，港股受內地股市的影響愈來愈大，港股是在美股和大陸股市中間走，所以若內地股市止跌回穩，港股可望企穩。