投資的天空：柳暗花明又一村

前一段日子大市反覆向下，淡友追殺好友，好友似乎山窮水盡，無路可逃，但這兩天借 QFII及憧憬 QDII推動反攻，看來似模似樣，實則冇咩新聞可炒，皆因 QFII與香港無甚關係，投資者只要看 A股對消息亦無大反應，就知港股升勢確有點耐人尋味。筆者撰寫此文時，正身處貴州，為獲捐助而興建的學校主持開幕，順道觀察民情，與當地的基金經理及投資策略師交換意見，發現他們普遍將今次 A股升勢視為反彈，基金經理未必一定正確，但內地是消息市，反映他們心目中，現時流傳的消息未足以形成新升浪。

筆者雖然是好友，但唔反對上述觀點，所以早前定下了期指終極低位 19296，只要守在其上，筆者就話之佢，原因係國慶將至，根據以往經驗， 10月份股市唔會放煙花， 9月亦不應有大跌。與去年奧運市況相近，現在大市回升，在升途之中，筆者曾減注套利，因士佳相信機會由跌而來，風險因升而至，如果期指未來能以大陽燭收高於早前高位 21210，並能企穩其上兩日，筆者才有信心大市可以再展升浪，否則現時高位臨近阻力，權衡之下，套利是好計策之一，其實由 19296到昨日 21100，將近 2000點，前後卻只用了 5天而已，如此急升有挾倉意味。但急升唔一定係差，因為何謂「急」，實在言人人殊，不過，大升特升卻未見成交同步躍進，士佳覺得有需要提高警覺。讀本文至此，讀者可能覺得筆者睇得幾淡，其實士佳依然係好友，只是趁高再適量減持之後，想吼低一點才入市而已。如果閣下注碼唔多，未夠分段入市或套利，寧願賺少一點，食少多覺瞓。類似論調，讀者早前可能在其他地方見過，當時大市下跌，大眾傾向往壞處去想，越諗越驚，到現在市況回暖，人人看升，筆者覺得反而應該嚇一嚇自己，情願等大市脫離危險才下注。讀者可放心，士佳未改好友方向，只是希望大市下跌可以拉低入市成本，筆者一樣有機會看錯，大市現時缺乏消息，上升理由欠奉，但理由可以在急升之後才出現，好似早前好友似乎山窮水盡，轉頭不已是柳暗花明又一村嗎？筆者與讀者一同拭目以待。張士佳　華富嘉洛證券投資服務部董事