陸羽仁 - 唔信唔信又料

昨日港股開市前外圍插水，美股杜指期貨跌100點，日股跌200幾點，港股在烏雲蓋頂的局面下開市，恒指低開319點，但插得幾插隊唔落去，跟住就開始反彈，上午一度高見21045點，但上衝乏力，21000點再度失守。午後深滬股市上揚，上證綜指突破3000點關口，收報3027點，但內地收市後恒指回軟，在20900點才見支持，之後在20950點間橫行至收市。

恒指收報20932點，跌229點或1.1%，期指收報20880點，跌260點，比現貨低水52點，成交減至57106張。國企指數收報12157點，跌111點或0.9%。大市成交縮減至只有509億元。

行業分類指數中，電訊業表現最差，恒生電訊業指數下跌2.8%，重磅股中移動(941)係拖累大市向下的主要力量。中移動早上在78元邊緣徘徊，午後跳水，至尾市才見支持，收報77.35元，跌1.7%。金融股昨日跟隨大市下跌，但跌幅相對輕微，恒指金融分類指數跌0.8%，跑贏大市。控(005)低開近2%後反覆回升，但受制於84元，收報83.85元，跌0.9%。


貿易戰A股照升

中環茶友話，港股急升後，在高位略為回吐，反覆整固，好似昨天的股市，日股跌勢甚急，大跌242點，跌2.3%，若港股弱勢，真係跌500點都得，但港股跌兩跌就企住，又唔跌得太多。港股好似美股一樣，上過高位就上落徘徊，無乜好消息衝唔到上去，但係又唔想大幅回吐。

中美爆發貿易戰，美國總統奧巴馬上周六宣佈對中國輪胎進口增加限制，在第一年將對中國製造的乘用車輪胎和輕型卡車輪胎加徵35%的懲罰性關稅，並在其後兩年中分別降至30%和25%。中國以牙還牙，在周日宣佈對美國的部份進口汽車產品和肉雞產品啟動反傾銷和反補貼審查。

不過估計此次貿易戰對中國經濟影響輕微，估計美國對中國輪胎加徵關稅很可能導致中國出口最多減少10億美元，等如08年中國總出口的0.07%。內地股市昨天更加贈興，唔跟外圍跌仲要升，滬深股市高開後，上證綜指再重上3000點關口，最後收報3026點，上漲36點或1.2%，上海和深圳兩市成交共計2,562億元人民幣，比上日增加逾一成。美國貿易戰搞唔大，中國係美國國債最大買家，搞僵搵鬼來買美國國債，所以多數係吵一就收場，中國股市亦擺出一個美國貿易戰郁唔到中國的姿態。

大市唔夠熱，但係新股就好熱，散戶認購國藥認到街知巷聞，連細佬仔都知道係乜，今次認股都有機會破紀錄。


呢舖輪到炒殯儀股

近期殯儀股當炒，表現最厲害的係剛剛以全配售上市的中國生命(8296)，股價連日創新高，昨日再升49%，收2.41元，成交3.8億股，金額超過8億元，自上周三上市以來，股價已大幅飆升近235%！連帶早年涉足墓園業務的勤達集團國際(1172) 亦順勢炒起大幅抽升近一成六。經紀張話佢本來都想買呢隻殯儀概念股，貪同類上市股份少，但上市第一日見佢升得咁勁，唔敢買，但唔信唔信又料。

陸羽仁同炒界老手傾起，佢話二三線股炒風並不厲害，炒得起只是少數，唔同幾年前細股「全國江山一片紅」，隻隻都炒起咁好景。老手話自從爆雷曼迷債事件後，證監睇得好緊，令不少「行家」唔敢太張揚去炒，有些人怕惹事半收山，等環境好再出來，所以唔係有好多隻炒得起，散戶炒股仔亦要更精靈，雖知落到車才是神仙。

昨日比較唔得的是汽車股，工信部日前公佈首7個月全國汽車商品累計進出口總額為339億美元，累計出口19萬輛，按年下降58%；其中進口金額150億美元，按年下降22.2%，出口金額189億美元，按年下降36%。

汽車股普遍受壓，跌幅顯著，跑輸大市駿威汽車(203)跌2.8%、東風(489)跌3% 、華晨(1114)跌2.1%、吉利(175)跌4.7%。