陸羽仁 - 生意難做航空業飛唔起

上周三國泰航空(293)出售部分手持的港機工程(044)股份畀母公司太古(019)，市場認為可以減少國泰批股集資的機會，刺激國泰股價向上，不過同航空業人士傾起，發覺佢今年生意認真難做。

國際航空運輸協會(IATA)早兩日對業內經營前景的評估，已經將大局講出來，國際航空協會話，由於燃料價格上漲，機票價格下跌，遂將全球航空業今年虧損預測由早前90億美元，擴大至110億美元，行業整體蝕大錢。協會將亞太地區航空業虧損預測由33億美元增至36億美元；北美航空業虧損增逾兩倍至26億美元；歐洲航空業虧損更達38億美元，較早前預測增加1.1倍。

歐美疲弱拖累貨運

航空業朋友講起，經營困難有幾方面原因，第一，雖然話經濟開始復甦，但生意距離正常尚遠，在貨運方面，因為歐美市場仍差，所以仍相當疲弱。客運亦唔見好得去邊，以國泰為例，主要靠飛頭等客和商務客賺錢，飛經濟位無得賺，?家頭等和商務客未回頭，所以國泰都研究緊拆商務位，加多高級經濟位，希望增加收入。?家航空公司最擔心頭等和商務客大幅減少，到經濟好番都唔會升番正常，怕公司改變開會的模式，開電話會議或視像會議就算，令本來周期性的收縮，變成永久性收縮，會唔會出現咁情況尚要觀察。

第二，行業無整合，本來經濟衰退，如果令航空公司倒閉，就可以減少行業競爭，改善幸存者的經營環境，但睇番去年風暴高潮時都無大航空公司倒閉，經營者無減少，生意仍然好薄。

油價回升焗做對沖

第三，油價唔算低，油價最低跌到30美元，?家又上番72美元樓上，以亞洲航空公司計，油價在70美元以下，航空公司尚可負擔，升到80、90美元時，已經好難頂，所以呢次衰退並無令油價長期低企，令航空公司賺錢艱難。油價升穿70美元後，航空公司焗住多做對沖，以平衡油價高企的風險，但若油價回落又要蒙受對沖損失。

綜合而言，航空公司經營環境仍然惡劣，日本航空公司因為受到金融海嘯影響，造成旅客大減，不堪虧損，決定動大手術，計畫3年內裁員5000人，又削減航，更向全球最大的美國達美航空求助，傳聞日航要求達美注資43億港元，同時也和法國航空及荷蘭皇家航空集團交涉，要求提供數十億日圓規模的援助。航空業朋友話，國泰的情況雖然好過日航，但一樣唔係太好景，所以出售港機工程12.45%，套現之餘獲利12.7億元，多錢責袋。花旗就將國泰的風險評估由「高」降至「中」，評級由「沽售」升至「中性」，目標價由10元升至14元。

內地航空業較好景

航空業朋友老友話，航空業的黃金期係在20、30年前，?家真係唔係咁好景，我問佢咁又點睇內地的航空公司如國航(753)，佢話國航的情況會好好多，一則國航業務空運比例小，客運中，頭等和商務位較少，加上內地受海嘯衝擊較細，環境本來好。二則內地航空業是近乎壟斷的情況，內地經濟發達，國航又食得比較多。主要負面因素係油價，如果油價失控向上，內地航空公司一樣會中招，佢話今年國航賺得多過國泰，真係唔係好出奇(但由於油價有機會再向上，證券行唔太睇好，例如瑞銀就話國航係要避開的股份之一)。老友如此解讀航空業的前景，可以作為大家投資參考。