陸羽仁- 大手抽新股 小心蝕入肉

新股潮因為中冶(1618)破底而冷卻，屬情理之中，但國藥(1099)逆市向上，認購佢仲有錢賺。

其實過去每次新股潮太熱時，都有咁情況，每當出現一隻新股王，吸引大量市民入飛，連帶其他質素無咁好的新股都受惠，新股王因為太多人抽而分得好少股份，借錢認購只食到粒糖，你唔可以話佢完全唔得，但去認購其他無咁好的股份可能破底，認要損手。你又唔可以話認新股一定死，因為只要慎擇質素高的股份，即使佢定價較高，結果都可以執少少，但如果好濫咁去認，就隨時中招啦。這又回歸到人逼逼的道理，人太逼的地方，即使買中派彩都唔好，一隻大熱門馬一賠1.5倍，中都無乜肉食。

大戶抽飛散戶焗接

其實大手認新股的主要風險不在於分到好少股份但股價跌10、20%，真正危險是分到比想像中多好多的股份再大跌，你用50萬本金，借500萬去認新股，在熱潮當中，通常只會認到價值2、3萬至7、8萬的股份，假設認到8萬元的股份，最後跌破上市價20%，你都只係輸1.6萬，計埋利息唔夠2萬，尚唔算係大數目。

最怕係入飛之後突然來一個股災，大市兩三日內跌30、40%，一跌大戶可以在配售部分抽飛，散戶認IPO借晒錢入晒飛想抽都無得抽，焗住接貨，可能接到40、50萬股(如果你太早入飛其他散戶可以臨尾唔入飛，你認到的股票可能更多)，結果一上市跌30、40%，就可以輸到20萬以上(即係輸一半本金)，雖然出現呢種情況機會好細，但不能完全排除。

似足早年炒細股

有一個類似例子可以參考，早幾年有一排炒細股炒得好旺，細股炒到咁上下就批股，當時細股批股例升，升完再批，炒第二轉、第三轉。有一次有隻細股批股，唔知點解批到好散，不只批俾機構投資者，連普通經紀行都問大客要唔要，有個股評人經常炒股，心諗認購批股只是「指鼻哥」，唔使現金入飛，唔怕認購，就同經紀行話佢認價值2000萬的股票，心諗咁多人認，最多分到200萬，一復牌升10、20%就沽，搵番三幾十萬就閃。

入飛要量力而為

點知第二日經紀打來，話好少人認購，結果佢分到成1000萬的股票，佢當堂呆，邊有咁多現錢接貨，借孖展俾按金都要俾400、500萬現錢，佢都無。其實批得咁散連大散戶都有機會認購，已經係一個訊息隻股唔得，機構唔要貨(好似中冶只是以中間價而不是上限價定價，已顯示大戶入飛唔積極，而且在競價時只願用較低價接貨)。講番當日隻細股復牌，一開市就跌30、40%，經紀行見股評人無錢俾孖展按金，二話不說就將佢大部分股票打靶，就咁唔見300、400萬，就係因為經紀一個電話問佢要唔要貨，佢一念之間話要，就發生呢個慘劇。

呢個故事教訓我，大手認購股票，在某些例外情況下有高風險，要量力而為