青心直說：維達盈利倍增之謎

越快樂越墮落，維達國際（ 3331）半年盈利翻兩番，股價逼近上市新高後表演空中飛人，洗倉式下跌，成交創近一年新高。但一巾不如一巾，主要做衞生巾、紙尿片的恒安國際（ 1044）業績升 54%，卻引嚟唔少換馬資金，令人大惑不解。同恒安多元化的紙品業務不同，維達齋做紙巾，所以即使半年毛利率急增 13.1個百分點至 31.8%，仍低於恒安的 45%。道理好簡單，紙尿片、衞生巾等日用品，無論市場競爭、銷售及業務結構等方面，都較 60%以上係生產低端卷裝廁紙的維達好。但點解論增長，恒安總係處於落後位置？經過深入調查，維達盈利倍增之謎，全因木漿價格。 08年國際木漿價創每噸 840美元歷史新高， 9月金融海嘯令全球需求急挫，木漿價格應聲插水，半年多跌 42%，至今年 4月先止血。木漿價格在去年第四季急跌，正是維達業績的及時雨，成本急降令下半年大賺超過 1億元，足足係上半年 1.7倍。

木漿原料價急跌
現時木漿價已由 4月谷底回升 14%至 550美元水平，維達管理層喺記者會話入定 15萬噸存貨，鎖定平均成本每噸 500美元，夠用到明年第一季，即使原料價再升，對今年盈利影響亦不大。不過當被問到明年點睇，公司只係話期望下年木漿合理價係每噸 650美元，仲強調係佢哋單方面嘅樂觀意願。即使真如維達意願木漿漲價 18%，即係話下年第二季開始，原材料成本肯定會急增。睇番 07年，當時木漿價飛升，雖然維達營業額升 30%，但整體盈利仍跌 26%，搞到上市冇耐就要發盈警。比較 06及 07年的平均木漿價，按年只升 10%，就令整體盈利急跌咁多，可見公司盈利對原料價幾咁敏感。不過，維達鴻福齊天，由於 07年盈利基數細，加埋 08年第四季木漿價急跌，結果就拉高咗全年盤數賺多逾倍。無獨有偶， 09年上半年亦係另一個翻版，因為 08上半年盈利能力被貴木漿大幅壓縮。同屬消費內需股，蒙牛乳業（ 2319）中期業績亦受惠於成本下降，中期盈利 6.62億元人民幣，增長 13.6%，營業額則跌 11.7%至 121億元人民幣，集團話上半年原料成本下降令 EBITDA利潤率由 7.7%提升至 9.8%， EBITDA利潤升近 12%，而整體銷售成本就急跌 14%。中糧集團 7月初夥厚樸入股兩成，變相局部國有化，此前 6月中溫爺爺至到過其唐山廠房考察生產過程，諗番轉頭擺明係順便做盡職審查，應該有助蒙牛自三聚氰胺事件後復元，盈利果然「返來囉」！胡孟青