陸羽仁 - 資金無走繼續炒

二十國集團周末開會同意繼續採取措施刺激經濟，直至完全復甦為止，令外圍股市保持樂觀氛氛，中國外管局擬提高QFII(合資格境外投資者)投資額度，利好投資情緒，深滬股市第5日上升。恒指在重磅股控(005)及中移動(941)高開1 .7%及1.2%帶動下，延續上日升勢，高開184點後，升勢不止，其後在20600點橫行。

內地上證綜指昨日中午一度衝破2900點至2919點，但午後無力再上，掉頭向下，2900點得而復失，臨收市前後抽，幸保不失，保持升勢收市。恒指受內地A股回順拖累，下午重開時升幅收窄，但回到20500點已見支持，港股市底甚強，尾市再升，收市企穩20600點上方。

結果恒指連升三日，累積升幅超過1100點，昨日收報20629點，升310點或1.5% ，期指收報20633點，升250點，比現貨輕微高水4點。國企指數收報11979點，大漲218點或1.9%。紅籌指數突破4000點關口，但受中移動倒跌拖累，跑輸大市，收報4 004點，升38點或1%。大市總成交略縮減至640億元。


你唔信佢又升

恒指昨日上升，主要由地產股及金融股帶動。地產分類指數和金融分類指數分別上升2%及1.8%，跑贏大市。當中表現最好的地日產股係信置(083)，瑞信話經近期跑輸後，信置估值已回落至吸引區間，評級由「跑輸大市」升至「跑贏大市」，目標價由15.78元，輕微下調至15.76元。信置周三公佈09財年業績，信置股價昨日偷步抽高4.7%至14.56元。

睇埋昨日中港兩地大市走勢，更覺上周五港股急升的市況有蹺蹊。上周五恒指在3點後大抽升500點，收市升556點，升幅2.8%。當時市場歸因於內地公布增加Q FII的投資額度，每家限額由8億美元增加至10億美元，這個消息只會增加投資內地的資金，對香港無直接影響，當時市場話由於內地當時已收市，所以港股炒內地利好消息咁話。

好啦，到昨日內地有市啦，對增加QFII額度此利好消息反應溫和，睇番上證綜指最終只升0.7%，升至2881點，並無如港股上周五咁大升2.8%。按道理如果港股上周五係偷步炒內地股市，A股到昨日交成績表無大升，港股上周五炒突要回吐至，不過港股昨日不但無回，仲要再升310點，又升1.5%，單計昨日升幅都大過內地股，所以話上周五港股急抽只是「借意」上升，利用QFII的消息炒上，並不為過。

中環茶友話，股市升總有其原因，千祈唔好唔信佢升，因為你唔信唔信佢又要再升。查實早前股市一浪調整落來，並未見有資金流走，港匯仍偏向強方，錢無走繼續搵炒，亦好正常。佢話在市跌時，見到一間歐資大行好積極買貨，主要掃H 股，外資力吸，也是H股跟唔足大陸A股跌幅的原因之一。


細價股難炒又有新例

藍籌股反彈，三、四線則個別發展。維達國際(3331)公佈，截至2009年6月底止半年業績，股東應佔溢利1.8億元，較08年同期6,176萬元增長1.91倍，每股盈利19.9仙，建議派發中期息每股3仙，股價升創近日新高後略回。集團行政總裁李朝旺於業績後記者會表示，集團將會擴大個人護理業務，並希望於3至4年間將該業務佔整體營業額約10%，由於紙漿價格仍然偏低，有助減低成本，短期集團業務前景應該可以繼續睇好。

細價股難炒，昨日又有一例，隻21控股(1003)昨日暴跌73.5%，由上日收市的1 .89元，急跌至昨日停牌前只得0.5元，佢喊都無謂。隻股昨日成交6792萬股，等如一日有21%發行股份易手，睇牌路好似俾人斬倉。隻本來做地產代理，早排宣佈轉型做風電股，點之炒兩炒就爆。炒細股風險之高，可見一斑，上錯車之老散，唯有收埋疊股票係櫃桶底，睇將來仲有無得翻身啦。