陸羽仁 - 內幕人士唔識睇？

內地A股朝早由升轉跌，加上市場配股減持活動頻頻，打擊投資氣氛，股市從高位調整。恒指過去連升四日，累積升幅超過1500點，昨日調整幅度溫和，算係一氣，恒指收報20851點，跌218點或1%，期指收報20822點，跌240點，比現貨低水31點，成交72587張。國企指數收報12106點，挫170點或1.4%。大市成交回落至626億元。

昨日市場無乜重大消息，焦點就落在各方減持股票上。中國社保基金於9月3日，以每股平均價10.03元，減持中煤能源(1898)1000萬股至8.78%。阿里巴巴(1688) 主席馬雲，以每股20.78至21元，配售1300萬股公司股份，套現最多2.73億元。另外聯想集團(992)母公司聯想控股，日前引入中國泛海集團為第三大股東後，持有聯想的私募基金德州太平洋(TPG)、GeneralAtlantic(GA)及新橋資本亞洲，卻在上日港股收市後，按每股3.55至3.57元，較收市價3.66元折讓約2.5%至3%，配售2.92 億股，最多套現10.4億元。在主要股東減持影響下，有關股份的沽盤湧現，阿里巴巴下挫6.7%，聯想亦挫5.7%。消息觸發市場憂慮股市是否見頂，打擊投資氣氛。



馬雲有水經 紀至愛

在幾隻股份中，阿里巴巴是大股東馬雲減持，當然更加矚目，阿里巴巴在上月中公佈中期業績，中期純利按年跌26%至5.1億元人民幣，業績好過市場預期，更派特別股息2毫，為上市後首次派息。阿里巴巴股價在7月中由13個幾起步，公佈業績前已炒上18個幾，公佈業績後再升，本周初升至22個幾，馬雲就借機減持，袋番2.

7億。

一般人相信大股東係內幕人士，佢都減持，隻股唔慌有運行。大股東減持當然對股價有壓力，但係隻股會否就此見頂回落，一沉不起，又真係講唔定，首先馬雲唔係沽清，只係估1300萬股搵使用，你要從大股東的角度諗，佢咁辛苦搞大間公司，搞埋上市，股息又唔係收得多，當然要趁好景批股搵水，做得咁大間公司主席，使費自然大，聽聞馬雲舉家經常在香港居住，或者沽股票想買番間大屋住都講唔定，我係地產經紀就一定搵幾個山頂大屋盤callcall佢。

大股東沽得貨當然唔會監平監賤賣，股價當然有番咁上下高，但話佢沽親貨都係沽個頂，咁又未必。歷史上最經典的例子，要算思捷環球(330)前大股東邢李沽貨，佢在05年3月大手沽貨，當時思捷40幾元，到06年9月再大手減持，令持股量跌到8.9%，當時也只是70元，但思捷高峰時在07年10月升到130幾元。最記得佢0 5年大手沽貨時，市場仲話大股東減持唔係好現象，點知話口未完隻股仲抽升，芬佬話思捷由家族公司變成西方式市場持股公司，更加專業咁話。以邢生在40幾元大手沽出的股價計，只及高峰的三分之一，當然其後經過一場金融海嘯洗劫，隻股? 家只有50元。

另外亦有不少公司管理層買完大跌的例子，好多公司管理層有認股權，由於行使認股權要將個股價差額計薪俸稅，但稅務上計價是以行使的日子計而唔係沽出的日子計，所以有管理層估自己隻股的股價會升，先行使認股權去認股又唔沽貨，想俾少稅，點知認完股就跌落來，結果交稅那筆錢仲大過佢賺的差價。

李四叔叫人睇「質地」

所以見上市公司呢大股東或管理層沽貨，唔好盲目信佢係知情人士，以為佢沽得隻股一定玩完，反而應該咁睇，「市場先生」自有其規律，而且呢人沽得貨通常都係旺市時，隻股沽完回一陣又升的情況都好常見。

另一方面，踏入9月，新股市場全面進入作戰狀態，市場矚目的重磅股之一國藥控股(1099)開始招股，聞說其配售反應超乎理想。而另一重磅股中冶(1618)及內地男士服裝企業利郎(1234)則於周五(11日)開始招股，相信下周的新股戰會進一步白熱化，特別銀有限的股民見到國藥和中冶真係魚與熊掌。經紀張話大路策略係入大飛抽國藥或中冶，但佢都見有抽新股老手另闢蹊徑，計劃棄兩大股而去博隻利郎，事關近日新股好少破底，利郎遇上兩大，申請人較少，抽佢會分得較多股數，所以係一個絕對投機的敲冷策略，不過膽汁少者唔好試。李四叔就話買新股要小心，以前股份無計得咁足，?家計得好盡，上升空間唔大，買新股主要看「質地」，佢就國藥和中冶都有認。