魚缸暴炒族：中遠洋 8元可收集

南北韓戰雲密佈，歐債危機又揮之不去，環球股海又吹起凜冽淡風，港股急瀉 682點，失守 19000點，收報 18985點。藍籌股陣營各有不同問題困擾，歐洲呢款形勢，即使滙控（ 005）本身業務真係唔畀歐洲玩死都好，但弊在淡友出手做野可能就會沽死！被內地網民改名做「赴死坑」的富士康（ 2038），其股價大跌近 10%收報 5.31元，該公司廠房陸續有員工墮樓，家陣歐洲經濟咁濕滯，對其業務打擊極大，昨日大成交下跌， 5元水平無險可守，唔建議撈底。以目前形勢判斷，歐債事件似乎無咁快收得科，對航運股影響不能小覷。中遠太平洋（ 1199）昨隨大市挫 6.2%，收報 8.68元，股價最低見過 8.5元，即曾跌穿 3個月低位，估計後市難免要下試 52周低位 8.12元，若見股價 8元頂得住，不妨趁低買入作中線；今年 4月中遠太平洋曾以每股 10.4元進行配售，若然低位買到貨，後市可以該配價股為食糊目標。方星俠