青心直說：世盃概念心水鐵膽

踏入 6月份，股民希望借世界盃為亂世打打氣，好讓市場增添幾分「河蟹」，順便博大鱷炒家在股、滙、商品市場狂轟濫炸竟全功袋袋平安後，轉移視線掛住睇波。市況唔就，冇人敢講世界盃行情炒股攻略，其實若果大家以分段收集方式買入作中線持有，呢個水平真係有唔少早前心儀但錯過咗卻又值得伺機翻叮嘅實力股。世界盃門票銷情唔理想，所以最大贏家唔係南非，而係體育用品嘅巨頭。多人睇電視直播，為咗感受現場氣氛，球迷總會買入波鞋波衫趁熱鬧。鍾意拼圖嘅朋友，不妨攞全球最大波鞋廠裕元集團（ 551）同道指走勢拼拼，十足十孖生兄弟，可見裕元對美國嘅經濟周期敏感度甚高。美國剛公佈，上月消費者信心指數升至 63.3點，超過晒所有分析預期。經濟真係講得咁差？又唔覺喎。
裕元分段吸得過

Adidas第一季業績受超級碗及世界盃帶動，大賺 1.68億歐元，按年升 34倍； PUMA首季稅前盈利亦升 7成，內地嘅李寧（ 2331）首季同店銷售則升 5%，可見體育用品銷情正隨經濟回升。歐洲出問題，消費者可能會減少消費，但原來即使經濟好轉，歐洲人都唔會使多啲。睇 Adidas盤數就知，首季歐洲銷售增 5%；增長最快係美國，多咗一成銷量；拉丁美洲更升 24%。即使歐洲回復金融海嘯後嘅蕭條境況，對大局應該影響唔大。受客戶庫存大減刺激，裕元首季純利升 10%，賺 1.2億美元，毛利亦回升。其實即使係最壞時刻， 09年裕元都維持全年派息水平不變。股價現時已跌至只得 10倍市盈率，息率近 4厘，現金充裕，分段吸納防守性相當高。裕元仲有旗下內地零售分銷旗艦寶勝國際（ 3813），佔 20%銷售貢獻，以寶勝超過 4000間零售店同合營零售店，係中國最大型運動服零售商，炒世盃行情點少得佢。但要留意，裕元兩成生意以歐元計價，歐元再跌對佢會有啲影響。所以想博一兩日波幅免問，中長線收息分注買入則坐得安心。胡孟青