陸羽仁 - 大淡倉點樣平倉？

美股杜指上周四大升285點後，上周五跌番122點，收10136點，跌幅1.2 %。評級機構惠譽降低西班牙主權評級，將其評級由AAA級調降至AA+級，但表示其評級前景「穩定」，即係半年內應不會再降級，西班牙議會上周四通過了該國近30 年來最嚴厲的削赤預算案，仍難逃調降評級的命運，消息令歐羅回軟，拖累美股回落。

在暴跌市中，會見到各地疑似政府入市的現象，例如上周二美股杜指一度跌近300點，跌到9700點，但尾市一個V形咁反彈番上去，升番近300點，當日只是微跌22點收場。我同中環茶友傾起，都覺得好多時美股在大跌日都在最後一個小時、甚至半個小時大反彈，有啲離奇。

政府會護盤

美股交易員對呢啲現象通常的解釋係「補淡倉」。不過我估如果彈番當日的跌幅三分一，甚至一半，都算係比較正常，但要彈到差唔多唔跌，一小時彈番300點，咁又誇張咗小小。美國政府承認過有一個救市小組，在市場不正常急跌時，救市小組會入市，我懷疑美股的救市小組在美股近期驚人大跌時曾經出動，政府擔心股市跌得太急會觸發股災，於是就入市護盤。

美國政府都有出手疑雲，中國政府就更加唔係好出奇。在上證綜指在對上一個星期尾跌穿埋2500點時，內地股市突然逆外圍跌勢而反彈上升，升得相當突然，都有好強政府護盤味道。

跌市跌過龍

正如我在上周一《股市試煉》所講，股市愈跌愈似入地獄，長線投資者要接受這些地獄式的考驗，當然，有時真係跌跌吓會跌入真正的地獄中，但有好多時見到這些地獄現象，都只是假象而已，但你頂唔順在低位沽咗長線投資的優質股，就真係有啲可惜了。

今趟殺過來的是真地獄抑或是地獄感覺，主要睇歐洲危機會唔會真正爆大鑊，我估全球中央銀行都在金睛火眼去?實危機的發展，佢哋知得一定比普通人多，熟悉央行運作的金融界高人話，佢睇到歐洲危機已初步受控，應該唔會爆出第二浪金融海嘯咁大鑊，佢認為市場有人借危機造淡，但如今已「過度做淡」，跌市有啲跌過龍。

金融界高人話危機會唔會深化，要睇兩大因素，第一係受影響的歐洲國家以至金融機構，有無現金去解決眼前的還債問題，第二是受影響的歐洲國家有無長遠削減赤字的措施，以恢復市場的信心。?家睇兩個因素都係正面，在歐盟加國際貨幣基金會定出1 萬億美元的救市計劃後，歐洲央行又同意實施量化寬鬆買債券的政策，換取時間進行結構調整。

不斷製造恐慌

咁點解歐盟提出龐大的救市計劃，受影響國家有現金解困，各國亦推出長遠滅赤的計劃，但歐羅仍然不能穩定下來，環球股市仍然大跌呢？高人反問：「全球金融市場如果唔恐慌，啲大淡倉點樣可以平倉呢？」佢話市場好似不斷提出新要求，開始時話希臘無錢還債，到希臘借到錢還債，又話佢地無意減赤，到佢哋推出滅赤方案甚至得到國會通過埋，又話佢哋無做到結構性改革去調整勞工市場(即係話在歐洲劃一匯價下，歐豬五國的人工相對貴過德法等大國)，總之要求日日新鮮，高人認為造淡者只是利用市場的情緒，延續、甚至擴展大淡市的氣氛，甚至引出恐慌性拋售。

高人話，歐洲股市和歐羅跌得咁厲害，當中必定有大量大鱷做咗極多的淡倉，去賭負債高的歐洲國家最後還唔到錢，甚至歐羅都要解體。歐盟突然殺出一個1萬億美元救市方案，把炒家殺個措手不及，但有實力的淡友捱過股市匯市第一輪反彈過後，等市場消化救市的消息後，又再出擊，散佈歐盟救市最後必將失敗的言論，再把股市匯市殺低。

淡友先不急於平倉，等你歐羅彈夠之後，歐盟招數用完之時，佢再來插你，話你唔得，搞到市場大起恐慌，大舉拋售歐羅和歐洲的股票，淡友就有大把水位慢慢買入平倉，只要市場夠驚，大淡友平倉都會平到好價錢，所以炒家要不斷唱淡，造出你沽我沽氣氛。

金融界高人係呢行的專家，自己同炒家都交過手，自有其深刻的觀察，假設佢講法係啱，我哋可以有幾重解讀。第一，歐洲債務危機不致會演化成第二波金融海嘯，大家唔使在急跌時將長線投資的股票清倉，反而有錢的朋友可以在大市下插時擇優吸納。第二，短期歐羅和歐洲資產以至全球股市仍然風高浪急，因為大炒家唔唱到有咁衰得咁衰，佢自己無辦法平倉，所以不能假設股市匯市馬上回復正常，天下太平，但炒家插得急時，各地政府又可能出來干預，所以好易出現大上大落的局面。

好股要長揸

長實(001)李超人話有朋友問佢好唔好買樓，佢話樓價回落咗啲，自住買樓可以考慮，佢其實只係講緊一個長線投資的道理。一般人買樓和買股有一個好唔同的習慣，買樓較易揸長啲，買股就好興短炒。若然一個地方經濟長線有發展，股又好，樓又好，長線都係反覆向上，但買樓你揸3、5、7年，甚至10幾年，就較易享受到長線升值的好處；但如果用同一筆錢去買股，就好易炒出炒入，升吓賺少少就走咗。我仍然睇好中國經濟，若果你唔想買樓，可以買股，但最好係長揸優質紅色股，目標係揸長啲，起碼揸佢3、5年，未必差得過買樓。

hightea@hkheadline.com 企業CEO陸羽仁‧逢周一至五見報