陸羽仁 - 好友飛撲叫入市

昨日終於見到啲金融市場穩定的表徵，唔係因為港股升，而係因為歐羅和澳元齊升，前排見過一隻彈另一隻唔彈的局面，昨日兩隻外幣一齊彈，歐羅反彈顯示歐洲的恐慌略減，澳元彈顯示市場對風險資產的胃納回升，甚至是套息交易拆倉潮告一段落。

港股恒指早上低開近200點，插穿19000關口，其後跟隨A股絕地反彈，而且愈升愈有，臨近尾市升幅收窄至234點，收報19431點；期指收19412點，升257點，國企指數收11208點，漲 192點，跑贏恒指，大市成交690億元。今日係期指結算，市況會比較波動。

地產股帶頭升

昨日兩巨股都無表現，滙控(005)逆市跌0.1%，收70.1元；中移動(941)跌0.6% ，收72.35元。大市上升主要由地產股帶動，恒地(012)更大升5.5%。

中環茶友話，市場在試探緊本周二恒指低位18974點，係唔係呢一浪低位。周二大市插到阿媽都唔認得，好多優質股都被人洗倉沽售，但恒指只係微穿19000點，雖然守唔住呢個大關，但之後一兩日好快又上番 19000點樓上，顯示在19000點左近都有唔細購買力。

大市初定，好友出籠，一個睇好股市，一個睇好樓市，睇好股市的係大摩，睇好樓市的係李超人。先講超人觀點，早一日李四叔出來對股市樓市語氣都唔係好確定，但昨日到長和系主席李嘉誠，就好明確咁叫人買樓，又話自己買長江。李超人在股東會後話，雖然近期發生歐債危機，但不要對未來經濟前景太過悲觀。

大摩叫買國企股

佢講本地樓市非常直接，話「樓價已跌咗幾個巴仙，有好朋友問我買唔買得樓，我問佢主要看自己cashflow(現金流)，自住唔怕買。在第二次世界大戰之後，買樓自用，即使買貴咗，過三四年睇又無問題。」佢又謂今次風浪過後，通脹會來，所以要買樓咁話。

在過去兩年金融海嘯期間，李超人一直都比較審慎，股樓都無叫人買，只叫人量力而為，今次似乎係比較清楚叫人入市。市場對此有兩個相反看法，一個想為樓市護航，所以要唱好。另一個睇法正面啲，話佢真係睇到樓市調整咗，叫用家買吓無壞，因為若樓市再升，後生仔又嘈買唔到樓，李超人都可以話叫咗大家買啦，你跌時唔買樓市再升唔好怪發展商噃。

我就話如果通脹向上，樓市好，股市都會好，若果唔想/唔敢買樓，都可以現水平買啲股對沖一吓風險。

摩根士丹利亦跳出來睇好亞洲股市，建議增持新興市場股票2個百分點至56%。

大摩指，雖然歐洲潛在收緊財政政策，但該行預期今年的經濟增長依然強勁，故相信股市調整是增持股票的時機。大摩建議買多隻超賣股，如遠洋地產(3377)目標價9.6元，潛在升幅86%(以出報告時計，昨日只有63%)；富力(2777)目標價16.3元，潛在升幅84.2%；上實(363)目標價53元，潛在升幅80.6%；中冶(1618)目標價5.9元，潛在升幅73.5%。富貴從來都係向險中求也。