一周兩件：慶鈴現金牛抵買

慶鈴汽車（ 1122）銀彈勁多，加埋今年嚟，祖國汽車市場表現唔錯，係時候昅昅。慶鈴去年底手頭現金 53億銀人仔，折合 60億港銀，相當於每股淨現金 2.42元，慶鈴現價都係得 1.78元。慶鈴超級現金牛，就算個市有幾橫風橫雨，冇有好怕。又啱對上星期頭，有祖國通訊社引述中國汽車技術研究中心公佈，國產汽車今年頭四個月，累計產量增加 60.6%，唔計出口嘅銷量，按年上升 35%。大圍汽車內銷市場好景，慶鈴亦應該有唔錯表現。估計慶鈴 2010年度純利增長 30%到 3.13億銀人仔， PE跌到 12.4倍。而呢個 PE水位，已經同其他汽車股好貼近，但集團 NAV折讓 44%，仲係折讓最大嘅汽車股，吸引力彈出。係咁易博慶鈴上番每股淨現金值 2.42元，講緊要升 36%。



港建極超賣穩陣

香港建設（ 190）同好多隻內房股一樣，呢期股價怒插，近個半月升幅抹得一乾二淨，日線圖 9RSI跌到得番 14，極度超賣。港建最新淨負債比率得 10.2%，穩陣到不得了。又唔計任何資產重秤，港建經呢期調整，現價（ 0.51元）相對 NAV1.2元嘅折讓，擴大到 57.5%，有唔錯折讓墊底，又有得諗。短打博港建反彈 20%，到 0.61元，仲未有耐上到 NAV水位。錢雋