青心直說：避難勝地金中淘金

大市由 4月中前見過 22388另一浪頂後，出現疑似一浪走低於一浪嘅局面。昨日早上淡友佔盡上風，期指喺 10點 45分被瘋狂質低，成交張數 20分鐘內超過 1.2萬張，指數由升轉跌唔見咗 200幾點，然後又係逢高仆儍瓜式沽落去。若果唔係貼市到連廁所都可以唔去嘅投資者，勸你唔好貪即市波幅，不如了解吓點解指數喺過去 12個交易日，竟然出現 5個裂口咁多。裂口頻生代表市場信心不足，特別係呢期恐慌來自對貨幣不信任，即使歐盟同意救希臘，投資市場擺明唔收貨。歐洲唔買得、美股唔平、中國有政策風險、樓市驚有泡沫，金礦股喺亂世中應可讓投資者坐得較安心。金價上月升達 6%，距離歷史高位 1226.5美元仍有水位，而且呢輪金價與美元同步升，顯示投資者擔心貨幣風險，多於買金嘅負利率效應。
瑞金「含金量」高

全球最大金礦商、加拿大上市嘅 Barrick首季賺 7.5億加元，升逾一倍。瑞金礦業（ 246）亦將於本周五派首季成績表，買金礦股，紫金礦業（ 2899）知名度高過瑞金，貪佢規模大有成 280個礦，儲量 701噸。但大唔代表賺得最多，投資者好多時問點解金價升，隻紫金都唔升，咁就要睇吓佢哋真正嘅「含金量」有幾高。比較去年業績，黃金業務佔收入最高係招金礦業（ 1818），達 92%，紫金及瑞金分別為 72%、 66%。不過講效率同股東回報，瑞金就最靚仔，按每名工人產量計，瑞金近 15公斤，紫金得 2.1公斤、招金 1.92公斤，之所以點解股本回報最高係瑞金（ 35.3%），其次係紫金（ 25.7%）及招金（ 16.2%）。睇埋開採成本就更清楚，瑞金去年每盎斯 208美元，紫金係 268美元、招金 344美元。雖說盈利能力高，但瑞金上市以來未派過息，公司話留嚟作收購，投資者焗住睇長遠啲，幫你戒短炒習慣。今時今日銀根冇舊年咁鬆動，最緊要公司手頭有錢，起碼唔會亂向股東伸手，減少股價短期波動。胡孟青