青心直說： PMI化身及時雨

內地 8月官方採購經理指數（ PMI）為 54，係舊年 4月以嚟最高，兼連續 6個月高於 50水平；中國物流與採購聯合會（ CFLP）公佈嘅 PMI係 54，滙豐編制的中國 PMI更大升至 55.1。一般來說，採購經理指數連續多個月高於 50，代表製造業正在持續擴張。由於 PMI係統計包括新收定單（ New Orders）、生產（ Production）、付貨（ Supplier Delivery）、就業（ Employment）及存貨（ Inventories）的情況，所以亦係反映經濟表現一個較領先的指標。恒指跌穿兩萬點、上證綜指一個月內回調兩成有多，網上調查更顯示，有七成 A股投資者相信熊市已來臨， PMI數字可以話係一場及時雨，唔使等中央出救市措施，已令內地股市止跌回升。市場亦出奇地睇法一致。大摩即時估未來幾個月，經濟會有雙位數增長，叫大家暫時唔好理 8月銀行新增貸款收縮至唔夠 3000億元人民幣，放心盡情買入。大合唱點少得細摩同瑞信，同日齊齊話 H股平，暗示調整已完成。

美裁員潮未止　前景未許樂觀
經濟數據加大行報告的巧炒「偶遇」都唔止，仲加埋美國隊一齊大合唱。率先公佈的芝加哥採購經理指數，錄得金融海嘯以來，首次重上水面的 50點；星期二晚亦會有全國的 PMI數字， 7月係 48.9，只要唔太令市場失望，分析員就能構建完美願景── 6月開始中國出口回暖，美國 PMI回升意味企業重新擴張，全球復蘇力度唔成問題……的確，睇番美國去年 2月至今， PMI由低位 32.9回升至近 50水平，反映救市資金陸續落到實體經濟身上。但仔細睇，之前提到 PMI其中重要組成部份係就業，單係呢一環， 7月只係多咗 2%企業話請新人，反而保持不變的增加到 70%、繼續炒人的降至 19%。反映裁員行動雖已進行得七七八八，並不代表企業重新大量請人。非製造業指數方面，包括飲食、教育、公共開支及娛樂事業等，捱到去年 9月開始跌穿 50，已連續第 10個月收縮。旺市不旺財，期內物價急跌 12%，反映裁員潮未止下，仲係賤物鬥窮人。難怪諾貝爾獎得主斯蒂格利茨都擔心經濟「嫩芽」會變「枯草」，連聯儲局議息聲明都只敢以「經濟企穩」而唔係「見底回升」作結，可見家吓情況未許樂觀。胡孟青