投資的天空：另類股市晴雨表

筆者一直話要等大市出現陽燭，昨日 A股有所反彈，表現本來不俗，但可能有春江鴨收到風，歐美會出壞消息，結果昨日臨尾向下炒。執筆之時美股未開市，相信表現未必會太理想，不過，筆者反而唔擔心有壞消息出籠，因為近日環球股市炒政府退市，投資者杯弓蛇影，將陰霾明朗化未必係壞事。筆者還是繼續等陽燭才入市，不是成功率高，而係勝在止蝕近，值博率高。當然，筆者信現在是牛市，做法應進取一點，但有些投資者喜歡求穩，可能希望等塵埃落定才入市。筆者倒有一個另類方法，就是利用 A股新開戶數目來試大市水溫。

股市經常強調市場氣氛，當氣氛好，投資者無甚顧忌，大市遇到的沽壓自然較少。與國外市場不同， A股市場散戶參與比例較其他市場高，新開戶數目某程度上亦代表了普羅投資者的想法，氣氛良好，大市狂升，自然多人想入市。 07年大牛市，曾經試過一星期內有超過 300萬人開戶； 08年淡市時，亦試過一星期只有 10多萬人開戶。股市經常向小眾一方前進，有人認為越多人開戶，下跌機會越大，但多人開戶亦可以解讀成資金願意投入股市，所以未必一定差。筆者自己傾向用新開戶數目去量度市場何時回暖，多於用來估頂，但必須配合圖表使用，例如當一個月平均新開戶數目連續兩個星期回升，而當時上證指數又持續向上，在周線圖上出現連續兩支陽燭，那就代表投資者願意入市，而且該批投資者並非入市「接火棒」；若連這兩周高位都可以升穿，就代表市勢真正好轉，再配合其他入市訊號，就可以放心買貨。當然，此指標唔能夠幫投資者撈中個底，因為散戶肯定不會在最恐慌時大舉入市，但有趣的是，上證綜合指數在 07年見頂後，直至 08年 9月金融海嘯，從未試過出現上述相互配合的回暖迹象，要到 08年 11月金融海嘯後，才出現此現象，可見有一定指標性。剛剛過去的 7月， A股新開戶數創下一年新高後回落，現在投資者都怕牛市玩完，相信即使他日回升，投資者陰霾亦有機會揮之不去，不過，如果內地股市到時能出現上述相互配合，投資者到時入市，亦信心大增。張士佳　華富嘉洛證券投資服務部董事