陸羽仁 - 三鬼拍門A股最痛

港股大力彈咗一日，昨日又回，恒指跌番280點，收20146點，我同中環茶友傾起昨日的市況，話係「三鬼拍門」，港股好難唔跌，呢三隻鬼係歐盟入市夾升後的回吐、發展商玩嘢罷投東涌地、再加上內地公佈4月數據，幾隻鬼一齊搵上門，港股無辦法唔嘔番咁上下出來啦。

狂喜過後有回吐

歐盟和國際貨幣基金會豪擲近1萬億美元救市，對上一日全球股市夾到飛起，特別係歐洲更加夾到發狂，上日英、德升5.3%，法國升 9.7%，希臘漲9%，葡萄牙抽升11%，西班牙股市更厲害，飆升近15%。點解西班牙升得多過被人唱得最勁的希臘？好明顯之前有大量對沖基金在沽空搞局，大鱷唔想入細水潭，不過到歐盟出手，淡倉大拆倉，亦都係西班牙反彈最勁，證明早前沽空佢沽得好狂。

大夾倉通常升得少少過份，之後回調。歐洲市昨日下午開市都跌番1%至2%，加上歐羅反彈完又回，昨日在亞洲市於1.2803至1.2669中間走動，走勢向下，令人有點擔心在匯市沽空歐羅的大鱷並未平倉。中環茶友話，歐盟出7500億歐羅救市，又話要量化鬆寬，意味着要多印銀紙，所以歐羅沽家仍有藉口壓住歐羅，恐怕惡鬥未完，大家狂喜過後都要冷靜番少少。滙控(005)股價反映歐洲戰情，佢昨日就回番2%。

歐盟救市後的反動，本已壓住大市，但真正插低港股的到底是內地公佈數據帶來加息恐慌，還是香港賣地賣得唔理想？若你睇住成日股市走勢，就會明白問題出在內地。內地在昨日上午公佈數據，一如我早前所料，這一輪數據會顯示通脹升溫，係股市的洪鋒，但公布初時內地股市反應溫和，但港股上午一直陰陰跌向下，在外資的眼中，數據是一如所料地負面，所以佢哋會出符合預期的負面報告。不過在香港食飯的時間，內地股市卻急插向下，跌近2%，港股午後一開市就腳軟，期指插到低見19790點，跌超過400點。結果上證綜指收2647點，跌51 點，跌幅2%。內地3點收市後，同一時間，東涌地拍賣氣氛薄弱，大部份發展商好似約好咗唔出價，有少少向政府施壓的味道，結果約在3點由南豐以低價投得，樓面地價只是2378元一呎，不過投地結果未進一步拖低大市，反而在A股收市後港股開始慢慢反彈，結果從低位彈番百幾點，期指收19936點，只跌264 點。

內地數據和A股跌市是拖低港股的殺手，內地經濟的確過熱，4月居民消費物價指數(CPI)和銀行新增貸款符合預期地高，預示中國繼續調控。

PPI高升壓力大

國家統計局昨日公佈，由於近期食品價格回升，加上大宗商品價格上漲，4月份居民消費價格指數較去年同期增長2.8%，創年內新高，接近3%的警戒線。

4月份生產物價指數(PPI，即製造商出廠價指數)按年上漲6.8%，漲幅比上月擴大0.9個百分點。PPI上得比CPI快，PPI在08年的高峰是10%左右，而家圖表上已好似一個V形咁走向高峰，關鍵是商品的入口價升幅好大，添加通脹壓力。由PPI將升幅傳導向CPI的可能性亦在增加中。

外資行普遍預期，數據增加內地加息壓力，例如摩根大通預期內地政府或於今年 5月至6月起加息，以及允許人民幣漸次升值，但內地考慮是否加息時亦要審慎觀察歐洲主權債務危機的發展，而且要確保整體經濟保持增長。

內地 4月數據等如一個洪鋒，捱過要呢一浪後，股市氣氛至有機會會好番小小。