青心直說：內房大小非樓市雪上霜

4月份內地樓價再創新高，按年升 12.8%，但商品房銷售減少 155萬平方米，價升量跌，調控措施成效開始顯現。大家成日聽到商品房，未必為意內地仲有一種建於農村集體土地上，只售予鄉鎮居民嘅「小產權房」，將會係未來左右樓市一大不明朗因素，亦好有機會成為中央進一步打壓樓市嘅絕招。國土部等 14個部委已聯合成立小產權房整治處理領導小組，研究制訂小產權房處理政策方案，針對發展商違規出售小產權房，及城市人偷雞買呢啲平樓。 SOHO中國（ 410）董事長潘石屹警告，好快會有翻天覆地嘅新政策出台。
小產權房若解禁供應飆升

小產權房係乜？簡單講即係轉讓時要補繳土地出讓金嘅業權，有啲似要補地價嘅香港居屋。不過，好多小產權房冇國家發出嘅產權證或預售許可證，一旦中央容許小產權房自由買賣，供應定必大增。據了解，單係北京就有超過 30萬套，有內地學者指出，目前可建小產權房面積有 60億平方米，足夠未來 10年全國發展。公開話樓市有泡沫嘅潘石屹，咁口響皆因佢嘅商廈賣個滿堂紅。 SOHO首季銷售額 58億元（人民幣．下同），旗下北京嘉盛中心、上海東海廣場及北京三里屯項目收益，已鎖定今年 90%利潤。潘主席今年打算喺上海投資 50億元，仲成功將市中心爛尾盤東海廣場起死回生， SOHO去年以每平方米 3.4萬元入貨後，將項目增值至 6萬元賣出，出租率提升至 82.5%。內房若出現形同股票市場「大小非解禁」嘅排山倒海式供應潮，受影響最深必然係住宅，甲級商廈供應就繼續緊張。 SOHO目前股息收益率 5.6%，毛利 52%，現金 120億元，市盈率不足 5.7倍，能否做內房股資金避難所，不妨自己計計數。胡孟青