青心直說：裂口尚未回補同志仍需努力

「橋唔怕舊，最緊要受」，歐洲打大鱷似足香港，以銀彈換取時間療傷，不過援助金額水份多於一切，而且越講越多，變咗 7500億歐元（下同）。方案雷聲大雨點小，當中 4400億元係歐元區出嘅政府債務保證，冇國家出事呢筆數就唔使畀，另外 600億元要喺金融市場上集資。若果我係機構投資者，肯定唔會科水畀歐盟，因為咁嘅安排簡直係「十個茶煲九個蓋」，遲早紙包唔住火，火燒連環船。《金融時報》大字標題話「全球齊心抗大鱷」，你哋美國佬攬歐盟你哋嘅事，冇理由拉埋我哋（ IMF出資 2500億元）落水。表面睇，即使唔少股份都出現雙底反彈，但大市係咪真正脫險？要觀察多三兩日，唔好忘記早前大手沽空嘅淡友都要補空倉，而且今日內地公佈經濟數據，歐元能否再大力反彈都未知，散戶不宜為一支大陽燭太興奮，因為恒指自 4月 12日以來已跌咗 9%，上面仲遺留咗好多個裂口！
打穩陣波炒波幅

今次反彈，成功撈底嘅人肯定唔多，反而俾個市激到心臟病發嘅朋友就唔少，特別係咁多日以嚟慘遭殺害嘅牛仔。經此一役，老散要學會轉倉嘅藝術──玩牛證唔係就咁打靶止蝕就算，想有仇報就應該喺手持嘅牛仔跌到距離收回兩三百點時，轉倉去較低收回價嘅牛證再博，否則大市再跌，你想沽都冇人接。仲有轉倉時記得留意，最好用同等兌換比率，否則若貪平換隻敏感度低啲嘅，個市就要升多啲至可以補番條數。見過鬼嘅睇怕短期都唔會再玩咁高風險嘅投資，即使想入市都唔好咁進取，宜捕捉啲有明顯波幅區間可跟嘅股份，如騰訊控股（ 700）、中國遠洋（ 1919）及中石化（ 386），呢類股份冇驚喜亦唔會有驚嚇，最啱呢個無定向風嘅波動市，勝在止蝕位近，止賺又有位可參考。入市位毋須逐隻畀喇，只須打開幅圖表，攞把間尺打橫畫兩條線就一清二楚。力不到不為財，自己做功課更自在！胡孟青