陸羽仁 - 歐盟出招鬥大鱷

全世界被歐洲債務危機鬧到天翻地覆，各國意見不一，行動遲緩，不過見金融市場愈搞愈大鑊後，終於打定主意出手啦！歐盟在周末召開緊急會議後宣佈，成立一個歐洲穩定基金，預計規模將達700億歐羅(6900億港元)，以對抗炒家狙擊歐羅，歐盟將發債支持基金運作。歐盟要趕及在今天亞洲開市前公佈成立基金的詳情，顯然想制止環球股市和匯市的災難蔓延。

成立基金挺歐羅

歐盟各國早前同意向希臘提供1100億歐羅貸款，希臘國會和原本最反對方案的德國國會已同意有關計劃，首筆貸款將於短期內發放，但單靠貸款計劃似乎止唔到咳，因為上周歐羅仍大跌4.3%，跌至14個月的新低，引發有11年歷史的歐羅最大危機。歐盟各國一直抱怨國際炒家狙擊歐羅和希臘等國家的國債，但各國無快速回應，德國一直唔同意援助財政紀律不良的歐豬五國，搞到救援方案一再拖延，炒家如滾雪球地不斷加入，大炒歐豬五國國債的違約保險(CDS)，並大量沽空歐羅，恐慌氣氛擴散，美國和亞洲國家開始批評歐盟行動緩慢，有可能將全世界拖入第二輪金融海嘯。

上周末歐盟國家緊急會議前，七大工業國(G7)財政部長先開一個電話會議，會後主持會議的加拿大財長JimFla-herty話，「?家需要一個清晰、快速而且強有力的回應，我地希望見到歐洲及早作出強力的政策回應。」其後歐盟16國開會，呢個會本來係討論歐盟各國如何協調經濟政策，但結果變成討論如何抗擊炒家的會議，開完會就宣佈要成立歐洲穩定基金。

今日有機夾淡倉

歐盟成立穩定基金的動機清楚不過，就係要同炒家對着幹，特別係炒家大肆沽空歐羅時，可以入市買歐羅頂住歐羅匯價。歐盟各國一直對國際炒家甚有意見，認為即使係「歐豬五國」都唔應該俾人睇到咁衰，但希臘獲得歐盟援助後，無理由國債違約保險(CDS)仲要升到973點子咁高(即是買希臘國債保險要付9.7厘年息)，歐羅一個星期內狂跌4%以上，全屬炒家炒作，標準普爾等美國評級機構不斷調降歐洲國家債券評級，有為沽空者推波助瀾之嫌。但歐盟講不滿無用，炒家照炒可也，今次歐盟成立穩定基金計劃入市干預，情況又唔同啦。

可以預見，歐盟成立穩定基金的消息，首見會在匯市投下深水炸彈，呢個基金點樣運作唔知，但按道理由歐盟成員國擔保發債，亦等如印銀紙，可以有源源不絕資金，同炒家對賭，咁樣就大大增加炒家沽空歐羅的風險，長遠呢個基金成唔成功唔知，但短期內一定對沽空者構成心理衝擊，加上歐羅累積沽空盤相當巨大，一平倉反彈的力度唔會細，所以預計今早都有大龍鳳。

歐盟大國唔順氣有它們的道理，歐洲國家的赤字雖然巨大，但美國赤字何嘗不大，歐盟國家平均赤字佔GDP比率為6.6%，低於經濟合作發展組織(OECD)的平均7.7 %比率，以經濟大國計，歐盟國家平均赤字佔GDP比率6.6%計，仍低於日本的7.8%，遠低於美國的10.2%，點解話歐洲唔掂，歐羅要插，而美元、日圓可以「避險」而大升呢？歐羅區中特別是大國德國、法國赤字較低，所以整體計唔應該有解決唔到的問題，唯一的問題是各國統一在一個貨幣制度下，令高赤字國家的調整較困難而已，但只要大國放下心結肯幫手，出手照保「歐豬五國」，佢哋又肯減赤，歐盟的經濟情況又係唔係差得美國、日本好多啫。

歐盟搞出這個穩定基金，最後能否成功，主要看歐盟大國能否團結，按理也可以有強大實力，和炒家長期周旋，炒家也是「取易不取難」，若見歐盟團結而強硬地捍衞歐羅，就會知難而退。

美國股市好「化學」

正如歐羅幣值一樣，金融產品值幾多錢，有時相當主觀，好似美股，早前全世界都跌，只有美股升，但經過近期一跌，美股今年至今的升幅已完全抹掉，上星期四的杜指狂跌近1000點驚魂，更令人覺得美股都相當「化學」。

我哋可能會問，點解美國交易所的交易系統容許股價咁短期內大插都無警示，因為香港的交易系統買賣數量限於3000手，無理由紐約交易所無任何限制。據說紐約交易所的系統有「慢流機制」，系統的確察覺寶潔的股價跌得太快唔正常，交易系統在2點45分自動慢下來90秒，但巨量交易離開紐交所之後，在其他成交較少的交易所卻可以繼續進行，不但無法阻止寶潔下跌，更因為咁樣分流令股價瀉得更厲害。

就係咁唔知點解，或者電腦自動交易將跌幅愈擴愈大，寶潔一度跌37%都唔算誇張，諮詢公司Accenture等6隻公司的股價由幾十美元跌到差不多零。睇落交易系統有問題，我哋睇戲都睇得多，不排除有人睇到系統漏洞，搞出「錯誤」，沽空期指賺大錢。但睇美國上周四市況，亦可見人心非常脆弱。

中國數據恐利淡

睇香港和內地的情況，亦唔好得去邊，內地A股上周五創下8個月來的收盤新低，上證綜指一舉擊穿2700點關口，深圳指數逼近萬點大關。內地股市大跌，除了外圍影響之外，內地嚴打樓市，加上通脹隱憂重燃，都是壓抑股市主因。國家統計局將公佈4月份主要宏觀經濟資料，預計CPI和PPI都有較大增長，顯示通脹壓力不輕，政府要收緊銀根打擊通脹，短期內對股市不利。

由此可見，今個星期股市將大上大落，既有歐洲入市的利好消息，又有中國經濟的利淡消息，股民入市無論造好抑或造淡，都要小心睇車啦！