陸羽仁 - 官府與野獸

歐盟決意成立穩定基金，協同國際貨幣基金會劃撥7500億歐羅作為彈藥，抗擊沽空歐羅和歐洲債券的炒家，果然出現大夾淡倉的狀況，恒指大升506 點，升幅2.5%，成交上番716億。

歐盟一直俾人意見不一的感覺，出招慢吞吞，搞到美國總統奧巴馬星期日都要打電話俾德國總理默克爾和法國總統薩爾科齊，叫佢哋「果斷行動」，結果歐盟今次出手又真係幾果斷，唔止搞出個近萬億美元的打大鱷基金，歐洲央行同時宣佈會在市場上購入歐洲各國的政府和私人債券，並且無講明有限額。

歐洲央行大力放水

這種行動類似美國聯儲局的「量化寬鬆」政策，是歐羅面世11 年以來的首次，歐洲央行唔會直接買政府債券，但佢開支票在市場買債券，同樣有「一雞兩味」之效，即可以入市支持歐洲的債價，唔俾炒家任意咁沽空，同時歐洲央行開支票出街，等如增加咗歐羅的基礎貨幣供應，錢流入銀行體系內又可以再生錢，有大力放水之效。

歐盟前日趕在亞洲星期一開市前公佈成立穩定基金的消息，但昨日亞洲市早段的反應比較平和，例如上午9點幾歐羅仍未升穿1.30。港股期指開市亦只係升200點多一啲，當時經紀張打來，話歐盟單嘢無乜料到喎，我叫佢唔好咁快下結論，淡友如果沽空咗歐羅、歐債，突然遇上咁樣的消息，會想頂一頂，但如升穿大位後，升勢就會轉急啦，因為過咗大位之後會有大量平倉盤湧現，淡友就唔係咁易守到。果然到下午歐洲開市後愈升愈急，歐羅上過1.3094的高位，港股下午見內地股市好番，加上歐洲主要股市開市都升 4%以上，法國在港股交易時段都升過6、7%，就跟住抽咗上去，香港期指一度升過600點，尾段略回吐，最後期指都升505點。

收市後我再打俾經紀張，話過去不同地方政府入市干預時，市場都唔信或唔想相信，好似昨日早上，其實有幾個鐘可以俾沽咗期指的淡友逃生，認輸200點離場，就唔使等近收市升到500、600點焗住打靶。

歐盟都好㷫啲炒家追住歐洲國家來殺，好似瑞典財長博格就話，呢啲狙擊歐洲的炒作係「野獸」行為，炒家如狼群一樣，會將弱國撕裂。歐盟入市，由官府鬥野獸，恐怕唔係咁快收場，仲有一番惡鬥。不過歐盟放咁重彈藥去打野獸，野獸即使想咬住唔放，風險都唔低。好似 98年香港政府入市咁，我同間間大外資行的阿頭傾，佢哋都話港府鬥唔過市場，但結果又唔係咁噃。?家最緊要睇歐盟團唔團結，若佢哋團結去打，說不定危機已初步見咗底。

德銀睇好滙控

昨日最標青係隻滙控(005)，大升5.6%，收77.7元，單係佢已貢獻恒指三成升幅。歐洲出事滙控插得特多，但佢上周末公布第一季業績其實唔差，德銀就話滙豐首季指撥備情況較預期理想，將重建市場的信心，德銀上調滙控2010年盈利預測8% ，仲話滙控現價吸引。滙控係重磅股，如果佢掂啲，恒指都會強啲。

內地快將公佈的數據始終係市場的隱憂，上證綜指昨日早段低見 2646點，再創新低，收市叫做轉跌為升，但亦只係升咗10點，收2698點，市場仍然怕將公佈的通脹數據會好高，預示有更嚴厲的緊縮行動，內地因素就成為港股未來的隱憂，要睇埋出數據時港股點走，若屆時港股回得唔多，就可確認上星期五的19699點係呢一浪低位。