青心直說：馬桶裏摷風暴真相

話歐洲金融風暴唔係人為造成，很難令人信服，因為實在有太多巧合。說交易員按錯掣，但當時竟然大量沽空盤早已入市，同時間負責提供市場上三分之二流通量的電腦快閃交易商卻突然停機，結果令自動買賣程式出現骨牌式沽貨。咁多巧合卻又找不到源頭，十足十似 03年淘大花園沙士疑案，最終答案要喺馬桶中才找出來。呢次嘅幕後黑手跟馬桶一樣咁臭，行兇者動機係食大茶飯，而手法就係 97年亞洲金融風暴嘅翻版。有心人利用一個又一個壞消息，從一隻貨幣開始狙擊，再配合所謂專家的末世預言，形成恐慌嘅雪球效應，大鱷極速將財富轉移。若果這次真是亞洲金融風暴的翻版，所謂風水輪流轉，中港市場即使要調整，跌幅將較細，資金甚至會流入避險。因為從基本因素考慮，喺香港上市嘅 H股說到底都係整體中國嘅內需概念股，只要內地可以維持相對較高增長，公司盈利有保證，抗跌力自然較高。
資金流入中港避險

此外，目前中國出口往歐洲所佔 GDP比重，已由 06年嘅 35.7%跌至去年 24.5%，直接出口往歐洲只佔國內生產總值 4.8%。大行估計，即使出口往歐洲再跌兩成，只會拉低中國 GDP約 1個百分點。況且中國已開始錄得貿易逆差，反映內部需求將可減少對出口嘅依賴。根據歐央行最新的數字，受歐豬五國影響最大嘅銀行體系，分別係葡萄牙（佔銀行體系資產 14.08%）、愛爾蘭（ 13.5%）、法國（ 10.4%）、比利時（ 7.93%）、荷蘭（ 6.79%）、德國（ 6.18%）及日本（ 5.02%），而美國只佔 1.57%。未來經濟火車頭始終在中國及印度等新興市場，而美國仍係全球財富最集中嘅地方。歐洲金融風暴只係全球資源再分配嘅進化過程之一，持較中線看法的不妨分段吸納現金多具防守性股份，好似中移動（ 941）及中國人壽（ 2628）等，而短炒嘅朋友則要有心理準備做「彈散」，因為上面裂口之多，市況肯定彈兩彈就散一散，短期內要全數回補裂口困難重重，係時候學用淡倉配合炒波幅。胡孟青