陸羽仁 - 風險資產有運行

歐洲危機惡化，港股昨日走勢相當弱，外圍美股早一日升佢唔升，昨日跌就跟，連內地股市反彈都幫唔到手，港股跌市成交升到770億，沽貨氣氛幾濃，短線小心要再尋底。不少醒目錢在炒港股，港股弱，或許反映了環球金融市場的避險心態正大大加強中。

唔止環球股市跌，多種外幣兌美元都跌，重災區歐羅跌穿1.30，昨日低見1.29 34。澳元本來相對強，但前日加息後，央行暗示暫不再加息，澳元散埋，昨日見過0.9066。資金正從高風險資產，回流美元資產，特別係美國國債更係避險勝地。風險資產有運行，等如股市唔係幾掂啦。

外資睇淡H股

唔好話港股昨日跌400幾點好似跌得少，因為上一日美股升港股唔跟，累計跌咗唔少。反而內地股市昨日有少少反彈，上證綜指升21點，收2857點，帶動港股下午反彈到20505點的高位，但內地收市後，港股上到250天線邊緣，不單止無力再上，仲掉頭下插，低見20293點，比高位回咗200點有多，一派彈都彈唔起咁款，收市大跌436點，報20328點，期指收20120點，跌414點，比現貨低水208點。A股彈、H股插，反映買H股的外資睇得淡也。

中環茶友話，港股跌穿埋250線，短線走勢向淡，若外圍唔好轉，港股仍要反覆尋底，20000點大關唔係咁易守得穩。外圍有點來勢洶洶，壓力不少，「投機的我」走短線向下炒好啲，但「投資的我」見到港股跌穿250線後，好多股份開始唔貴，心郁郁想買貨，我就話個市唔似一兩日就雨過天青，所以要買至好慢慢分段買。

今次外圍跌市源於市場認為希臘危機無咁易解決，本來歐盟已於上星期定出11 00億歐羅的援助協議，一度露出解決生機，但在希臘國內遇到強烈反對聲音，希臘工會發起連續兩日大罷工，令市場擔憂希臘最後無法達到削減赤字的目標，最終都會失救，承保希臘主權債券的「信貸違約調期」上日大升84.5個基本點子至731點子(即7.31厘)，這反映出希臘5年內有45%違約可能性。市場更擔心歐洲債務危機仍可能蔓延至其他歐豬國家。

保誠收購有阻滯

歐洲危機惡化，股市活動也受影響，英國保誠保險蛇吞象收購美國國際集團的亞洲業務(AIA)，原本保誠想在合併完成後，將保誠以介紹上市帶來港上市，但佢收購先要供股，但昨晚傳出供股文件要延後推出，令人擔心這種市道會否最後令保誠的巨額收購泡湯。我一直話愈多新公司上市，愈多資金湧來香港，本地股市就愈旺，反之若新上市活動泡湯，就對大市唔係咁利好啦。

涉及歐洲業務較多的重磅股滙控(005)同渣打(2888)自然難逃劫數，大笨象以接近全日最低位收市，報77.55元，挫2%；渣打發佈中期管理公告，確認2010年第一季度收入和利潤均再創新高，但好消息遇上跌市，股價仍然勁跌3%我估主要受其歐洲業務拖累。

最後都要講吓滙控主席葛霖昨日評環球經濟，又唔係睇得咁淡，佢話去年是金融轉型之年，今年大部份國家的經濟已回暖，相信主權信用評級問題令全球經濟二次探底的可能性不大；佢又話美國負債率雖比較高，但美元仍是世界的儲備貨幣，所以美國還是具有優勢。咿？滙控去年擔心雙底衰退，如今又好似改為睇番好少少噃！