陸羽仁 - 歐洲變局阿爺變招？

歐羅大跌潮昨日在亞洲市延續，歐羅兌美元低見1.22，創4年低位，美元急升，略為有啲風險的外匯如澳元亦下插，避險情緒高漲，在呢種金融市場動盪情勢下，股市無運行，恒指在外圍拖累下低開313點，最多跌逾550點，不過恒指喺內地A股收市後收窄跌幅，收市報19715點，跌430點；期指尾市彈得更多，收報196 34點，跌293點，比現貨低水81點，成交放大到90588張。

港股昨日可以講係屍橫遍野，上漲股票只有84隻，下跌嘅就有1097隻，平手19 4隻。由於市場擔心歐美經濟第二次探底，上周炒過大反彈的出口、資源、航運股走勢最差，金融股則以涉及歐洲業務比較多嘅滙控(005)及渣打(2888) 表現較弱。

滙控收市報72.9元，跌2.3%，成交33億，佔大市成交5%，拖低恒指60多點。

港股昨日跌穿埋5月7日的低位19699點，低見19593點，港股向下穿位，走勢不妙。中環茶友話，歐盟動用1萬億美元入市，本來彈藥唔少，可能歐洲央行唔慣入市，講完之後無嘢跟尾，唔似美國年幾前一宣佈入市就動作多多，所以淡友好快就插番轉頭，大力進攻歐羅。歐羅回得咁急兼穿晒位，有少少意外，結果就觸發更多止蝕盤出籠，推低股匯大市。

恒指破位走勢弱

不過港股跌得唔算多，內地跌得仲甘，上證綜指勁插5%，跌到2559點，連2600 點大關都輕易失守。內地股市連番急跌，開始有啲恐慌性，外資估阿爺就快要維持秩序。

有中環茶友講起08年的舊事，內地股市樓市在07年炒到好高，溫總在08年初連番出招調控，但到當年5月打後美股巨型金融公司先後爆煲，環球金融市場開始變味，但內地無理到外圍變化，繼續出招調控，變成跌市遇上政府調控雙重打擊，跌上加跌，到08年9月後雷曼爆煲，中央才知道大鑊，要急轉彎由調控變救市。而家歐洲危機隱現，但阿爺尚在大力打壓樓市，又會唔會出現番08年外圍調整內地還要打壓的情況？抑或係內地聞到外圍變化，會由單向打壓變成「有保有壓」呢？

外資開始炒緊阿爺將會變招，首先係炒人民幣升值的預期急促降溫，炒作人民幣升值的工具主要是「人民幣不交收遠期合約」(Non-deliverablecontracts)，昨日是4日來首次下挫，不交收合約新價只反映人們預期人仔只會升2%，比早前預期升3%低。人仔遠期合約回軟，顯示市場開始關心，歐洲債務危機會影響全球經濟，中國亦會推遲人仔升值的步伐，因為過4個月人仔跟美元走，兌歐羅已升值了14%，令中國對歐洲的出口壓力好大，匯價上升令成本大升，中國對歐洲出口殊不樂觀，可能會拖慢人民幣升值速度。

A股基金溢價甚高

另一方面，在港上市的A股基金如A50基金(2823)持續出現溢價，例如A50昨天只跌3.2%，低於內地大市跌幅，A50昨收11.94元，但每股資產淨值只有10.95元，市價相對資產淨值有高達9%溢價，反映外地投資者比較看好大陸市場，才會造出這樣高的溢價買A股基金。

外圍局勢未穩，投資務必要小心，美銀美林亦有建議，佢話市場短期動盪，估計未來3 至6個月投資情緒會較負面，但倘若移除政策風險，內銀股長線的基本因素仍然強勁，佢認為工行(1398)係核心防守性股份，因分行網絡廣，及資本面強勁，予「買入」評級及目標價6.55元，建議逢大跌後吸納，但在內銀股中美林最不喜愛的股份為招行(3968)，認為股價估值較高咁話。