陸羽仁 - 金融資產大執位

歐盟出招救市後，金融市場反彈了幾天，上周五再插，市場憂慮歐羅解體，歐羅跌穿1.25，再隊到1.2354創新低；美股杜指上周五最多跌245 點，到歐洲收市後，杜指從低位反彈番85點，收10620點，都跌162點，跌幅1.5%，最後仍跌咁多，只能話美股係弱弱哋咁樣穩定下來。

埋單計數，歐盟入市後，總結上周成個星期，環球股市仍有進帳，德國股市升6%、法國升5%、西班牙升3%、英國升2.7%(特別有保守黨成功組閣的刺激)、希臘升1.7%；而美股則升2.3%。

美元強過黃金

在歐羅弱化的前提下，美元再創新高，美元兌六隻主要貨幣的美匯指數收86.1 0，比即市高位86.29只是略回，仍升1%，氣勢如虹創近期收市高位。黃金近排和美元齊升，但上周五黃金走勢不如美元，有點高位疲軟的感覺，黃金上周五的日中高位是1249美元，這和上周三造出近期高位相若，看來1250美元阻力都唔細。

歐羅、歐股上周五再急挫，市場憂慮歐羅解體，首先由美國聯儲局前主席、現任美國總統經濟顧問沃爾克(PaulVolcker)的言論觸發，82歲的沃爾克在倫敦發表演說，話擔心歐羅最後會解體。

沃爾克這種重量級人馬話擔心歐羅解體，你都咪話唔驚。西班牙報章《ElPais 》的一篇報道，亦惹起市場擔憂，報道話對上一個周末當歐盟緊急開會商議救市方案時，德國總理默克爾初時唔接受，但法國總統薩爾科齊威脅話，若德國再唔同意救市，法國就會退出歐盟，結果德國總理默克爾被逼同意救市方案。雖然報道提到呢三個國家的領袖事後都否認有呢件事，但市場深信不疑，擔心歐洲大國有裂痕，結果就插多歐羅、歐股兩下。我都信信哋呢件事係真嘢，因為歐盟斥資近1萬億美元入市，的確好違背德國人一向的態度，一定係發生咗一啲事，先至逼到默克爾就範。

歐羅長遠弱勢

?家睇番歐盟決定入市後的環球金融局勢，見到入市有效果，也有反效果。歐盟和國際貨幣基金會決定投下近1萬億美元鉅資入市，即時在歐洲股市、債市和匯市產生夾倉效應，但在股市和債市的效果顯著得多，但救市方案對歐羅的即時支持作用已相當有限，歐羅在歐盟宣佈救市當日由1.25反彈上1.309，都未升穿 1.31，跟住就回，到上周五再破底。點解救市方案在股市、債市得，在匯市唔得呢？

歐洲央行過住十分保守，唔似美國咁樣大力「量化寬鬆」，過去歐洲央行亦無買歐洲國家的國債，任由歐洲各國的債價下跌。但今次歐盟救市照抄美國方案，同樣用直升機掟銀紙落去金融市場，講明會大買歐洲國債，客觀效果係會大大增加歐羅的供應。歐洲公佈大救市方案後，估計不但沽空歐羅的炒家無離場，連帶一些歐羅的長線揸家卻要減倉，出現資產大執位的現象。

一些環球大基金以至各國中央銀行，雖然主要持有美元資產，但亦持有部份歐羅資產，如今歐洲令人意外地印銀紙，就觸發市場擔心歐羅長線會不斷貶值。過去美元跌，黃金等商品升，就代表市場風險胃納上升，唔怕買多啲風險投資產品；反之市場風險上升，投資者要避險時，就會把資金轉去買美債，令美元上升，黃金等商品下跌。但上周是美元、黃金齊升，同正常情況唔同，就反映投資歐洲資金走鬼的現象，有些去走買美元、美股及美債，所以美元、黃金齊升時，主要不是一般的避險情緒，係「避歐羅情緒」。到上周五黃金升幅無以為繼時，就係避險情緒升溫，資金連黃金都唔太信，主要流向美債，呢啲就似「避險情緒」。

美元黃金齊

升

如果呢個推論係啱的話，未來歐羅走弱係大趨勢，暫時睇唔到佢有轉強的理由，只能趁反彈減持，撈底風險唔細。若市場風險胃納好時，會沽歐羅追捧黃金和美股，風險情緒差時，更加會沽歐羅追捧美債，兩者都意味着資金流入美元資產。

歐羅咁跌法，當然會影響市場情緒，而且出現這種全球資產大執位的局面，也不是一時三刻會完成，可能令歐羅反覆急跌，所以市場仍然隱伏危機。不過我估股市仍有機會守住低位唔穿，開始一浪高於一浪的反彈。

港股過去幾個月積弱，和內地股市反覆大跌脫不了關係，上證綜指上周連翻試底，跌穿2700點，到上周五收報2696點，內地股市跌到去年9月低位近 2600點時，有少少唔想再跌之感。

阿爺正在打壓內地樓市，但如股市再大幅穿底，又非中央所願，怕對經濟都可能有影響。《人民日報》認為，如果有關方面採取一些措施例如社保基金提高入市比例等，多方面開拓股市資金來源，使股市融資流出的資金和引入的資金相匹配，就更有利股市穩定。

農行上市買

內銀股

內地股市試底，就諗到阿爺可以引水支持股市，內地媒體《經濟觀察網》引述消息稱，中央的匯金公司將有可能獲得600億資金增持工行(1398)、建行 (939)和中行(3988)三大行，同時社保基金已獲准買入中石油(857)和中石化(386)，以維持市場穩定。話阿爺要做吓姿勢挺下內地股市，都唔係太離題，四大國有銀行中最後一家農業銀行計劃在7月上市，如果市場如此低迷，已上市的工行、建行、中行股價都跌到好殘，市盈率好低的話，對農行上市定價相當不利。過去建行回歸A股前，阿爺都曾增持已上市的內銀股明托市，如今內銀股更低殘，匯金公司吸貨增持的動機更大，只要阿爺開綠燈，匯金多多都夠膽買。

股市危機會與機會並存，睇住農行上市的前景，趁內銀股三大行插得深啲時吸納吓，都有一定值博率。

企業CEO陸羽仁‧逢周一至五見報hightea@hkheadline.com