陸羽仁 - 有家教重要過有錢

前講到26歲網友TKINGC的個案，佢為自己儲蓄唔多，為孩子的未來而擔心。

佢睇完我畀佢的建議後咁回應：「依家我的目標唔係諗來緊點扮靚點憂心唔夠錢用……幾時退休……我的目標係每個月要儲到1萬或以上，要係一個時間儲到一筆數目資金，要好好增值自己，我的目標係開心的！因為我希望小朋友過得好啲，咁我就安心開心啦！唔辛苦唔得世間財……我就話唔辛苦過就見唔到彩虹……一條屬於自己的彩虹！謝謝陸Sir！媽咪無介紹錯(叫我睇呢個網誌)，哈哈！」

見到TKINGC的積極回應，我都好開心，立時想起一個說法，「以生命影響生命」。早前見到一則新聞，有對年輕父母有錢買煙，無錢買奶粉，活生生把三個月大的女兒餓死，看後令我唔開心了好一陣子，心中問「點解香港可以餓死人？」

唔好怪我唔客氣講句，呢啲人生仔只是性愛快感的意外產品，搞完「闊佬懶理」，事後去搞掂的動力都無，才把女兒生出來，才留下一個短短三個月沒名沒姓的人間遺憾。所以一句話，若自己唔愛仔女，就唔好生啦。父母的黑暗生命，直接投影到兒女身上。

唔愛仔女唔好生

TKINGC咁生性，有心為仔女設想，「希望小朋友過得好啲」，所以想努力儲錢，係一件好事。的而且確，在香港這個社會，有錢並非萬能，但無錢萬萬不能，最緊要自己有一定家財，人生才有選擇。例如我唔係幾贊成有理無理都送個仔女去外國讀書，但係如果佢中學畢業成績真係唔掂，在香港讀唔到大學，你到時有錢，仲可揀送唔送佢出國讀書，佢出去讀4年，平平地去澳洲、紐西蘭都要百幾萬，送唔送佢出去，等於用唔用錢去為佢買個前途，如果到時你連百幾萬都無，想揀都無得揀啦！

不過話得說回來，我始終覺得，養兒育女，父母的身教最重要，唔係有錢畀佢學十樣嘢讀名校就一定成功，我可以講講我自己的經驗。我7、8歲時，我媽媽講了一個故事給我聽，佢50年代來咗香港幾年，在一間唐樓租一個牀位住，那種環境應該差過而家的籠屋，因為佢的牀位係最高嗰種，在天花板底下用木板造出來，一個人瞓都只是剛剛好。阿媽當時在製衣廠當車衣女工，收入僅可餬口，仲時時驚失業

肯捱肯搏有出路

阿媽話有一日晚上正想上牀，發覺門口有哭聲，走出去睇吓，發覺頭房兩夫婦請的妹仔(即工人)，坐在大門口喊，原來那時租一間房的已是富戶，那個富戶夫婦因為少少唔滿意把妹仔炒掉，叫佢即晚走，那個妹仔立刻無家可歸，諗住今晚要瞓街，所以忍唔住喊起上來。阿媽話自己當時抵唔住頸，唔想呢個十幾歲的女仔瞓街，就叫妹仔走埋去佢個牀位一齊瞓，結果兩個人一齊逼在一個3 呎乖6呎的「木盒」中，後來阿媽仲介紹那個妹仔去了自己間製衣廠打工，兩人成為好朋友。這種「歲月神偷」式的故事，就在50年代不斷發生。而阿媽咁窮都去幫人的故事，亦對我小小的心靈有好大影響，亦明白到只要肯捱肯搏，點都會有出路。

我想告訴阿TKINGC，你努力工作儲蓄，你的生命亦會影響的你下一代，佢會學似你一樣，做一個「樂觀、積極、上進、開心」的人，唔會太「hea」。唔好覺得自己依家無乜錢好不幸。如果你好有錢，但對仔女闊佬懶理，對人頤指氣使，以為乜嘢都可以用錢搞掂，你估你啲仔女大咗又可以做啲乜嘢人？甚麼樣的父母，就有甚麼樣的子女。這就是所謂「家教」。努力吧！

簡介

財經專欄名家陸羽仁，貴為企業CEO，周一至五在《頭條日報》開筆談股論市，深受讀者歡迎，更在頭條網開BLOG，分享投資心得，累積點擊率已突破七千萬人次。

www.hkheadline.com/blog/index.asp

網上英雄會