陸羽仁 - 先升值後加息

港股昨日走勢有點人為味道，殺完好倉殺埋淡倉，在外圍無乜好環境下，期指一開市就拉高引人追，但到恒指開市後向低走，滑到20050點先至窄幅徘徊，內地股市其實無大上落，但港股卻發晒軟蹄。

在到3點後又有異動，尾市大笨象發力，恒指觸及20000邊緣強力反彈，最後一小時抽上近 210點，收市倒升65點至20212點；期指仲升多100幾點，收20144點，大升208點。

歐洲又打類固醇

中環茶友話，昨日個市似一個鑊仔咁炒番上，相當玩嘢，外圍無大波動，但港股卻先殺好倉，再殺淡倉，尾市睇重拾一啲動力，另外，恒指10天線已跌穿了250 天線，下壓至20500點水平。因此，20500點關口，可以看作為首個反彈阻力。

雖然歐盟救市方案公佈一日後，有不少人開始話方案未必掂，但美國市早前急插都係因為歐洲唔穩所致，如今歐洲學美國咁大印銀紙大打類固醇救市，唔好話佢會大升，只要佢穩住唔大插，咁都唔會拖垮美國。前大摩策略師碧斯就估，美股可以因為科技股帶動，從低位升番20%。

昨日尾市抽上的動力主要來自重磅股滙控(005)。扯高滙控比較易解話，佢近期受歐洲債務危機拖累，跌得太殘，都係時候有番啲反彈。另外，滙控強勢亦得力於瑞信唱好，瑞信表示滙控首季稅後盈利，遠高於去年首季。滙控受環球銀行及市場以及美國業務表現帶動，抵銷部份較高稅率假設。

瑞銀因此上調滙控盈測3%至6%，現價今年預測市帳率1.6倍，2011年市盈率10 倍，預期表現符合恒指，維持「跑贏大市」評級，目標價維持97元。

發展商玩嘢唔投地，令東涌地低價成交，但市場似乎相信地產市場唔係差成咁，所以地產股都無大跌，恒指地產分類指數只是微跌0.6%。麥格理指出，東涌賣地反應差只屬個別事件，應不會對未來兩、三個月拍賣的三幅土地構成影響。現時香港發展商持有的土地儲備，平均可供未來3.3年開發，較歷史平均水準的4至5年少。而且，未來土地供應陸續增加，相信發展商對補充土地儲備仍維持積極態度。該行對香港住宅市場的前景維持樂觀，維持樓價按年上升10至15%的預測。

地產股唔似有事

摩根大通認為，現時香港地產發展股正以較每股資產淨值折讓29%的價格交易，相對其過去長期維持的約16%折讓，估值吸引。隨着政府增加土地供應及土地價格或回落，房地產市場或將出現「軟着陸」，這將減低政府進一步收緊措施的風險。

至於市場另一焦點，係內地通脹。中銀國際有個報告值得留意，佢話內地4 月CPI增長2.8%及PPI上升6.8%，都高過預期，同期人民幣貸款增長22%，內地正面臨巨大的流動性壓力，該行預計人民幣升值進程將很快再次啟動，具體時間可能在歐洲主權債務危機國家的市場顯示出初步企穩跡象之後。中銀國際指，雖然市場的加息預期加大，但該行仍然認為人民幣升值將先於加息，來自人行的資訊顯示，人民幣匯率體制改革將很快啟動，下一步將是加息。

中銀國際睇內地政策應該唔會太流，如果人仔升值升溫，加息稍稍推遲，熱錢炒人仔升值流入香港，應該有助港股穩定番喎。