陸羽仁 - 上落市要用游水策略

網友迷茫中青呢10年的股票加基金投資，前前後後投入過大概100萬，但10年來賺左唔夠20萬(包括帳面及實質回報)……

迷茫中青講︰「我嘅失敗經驗係，在高位，好難清倉(因為唔知何時是頂，開始跌時亦怕清倉後就回升，左一巴右一巴)，大跌市時難免有損失。陸Sir可否分享一下如何在市場大升大跌時，都可以長遠保持10%平均回報？謝謝。」

升得太癲要減持

我話長綫投資坐定唔郁的部分，都唔等如完全唔可以減持，如果你覺得股市升得太癲，例如去飛髮三九唔識七的理髮師係咁同你講股，仲話自己炒股賺咗好多錢的時候，睇番吓市盈率，如果升到好離譜，例如內地股市升到50、60倍，香港股市升到30、40倍時，可以開始減持部分長綫投資。

記住不用一注沽清，沽完再升又沽啲，每次沽一半，都可以有排沽，日本股市90年代有超級大泡沫，升到200倍市盈率，若日本人在50倍時沽清股票，見佢日日升，亦可能會好痛。

另一個策略就係一個「游水策略」，這是中綫投資策略，唔長唔短，我認為對一般散戶而言，低買優質股長揸(例如買指數基金)，係較易處理的策略，相反叫散戶游水進出，唔係咁易處理，弄不好買咗貨賺少少走咗，追貨又要坐艇。咁我點解仲叫大家都諗諗「游水」的策略呢？

買股似量體裁衣

在一個持續大幅向上的升市中，唔游水好過游水，但在上落市中，買股長揸未必得，所以亦可考慮游吓水。這裏也可以講一個古仔，也是我去游真水時聽到。幾年前有一次去跑馬地一個富貴會所游水，聽到一個幾富貴的阿伯，講佢點買滙控，佢話：「大笨象今時不同往日，以往業績一年比一年好，股價持續向上，買佢坐住唔郁，加埋派息一年20% 回報好平常，但?家股價比較呆，坐住唔郁，成年到頭除咗收息，股價都無乜上落，所以我咪游下水囉，佢一年都會炒一兩次，通常在公布業績前開始炒，公布完業績無乜大突破就回，每次升到10%，我就沽啦，等低位再買番，游到一轉我賺10%，游兩轉賺20%，都叫做追到以前的回報㗎。」我當時諗富貴老伯日日對住股市呢個金魚缸，真係有啲研究，留意到大笨象開始弱化。

買股就好像量體裁衣一樣，要找適合自己的方法，我建議投資組合都係以長綫的長揸或中綫的游水為主，佔組合7成或以上，主要買指數股或巨股，其餘3成或以下是比較投機性的部分(年輕人想加大投機的比重，唔係唔得，但你要有輸清的準備)。

有些市況是逼人投機的，假設如今已是牛市第三期升到好癲時，你當然可以唔買股，但若要順勢買股時，也要明白買親都係投機，40、50倍市盈率，買幾好的股票都有投機的成分，咁就要硬守止蝕，兼且手風順食到咁上下時都要走啦。我講的投資方法，係細水長流，不要求年年倍升，只要求唔蝕兼有合理回報。 簡介

財經專欄名家陸羽仁，貴為企業CEO，周一至五在《頭條日報》開筆談股論市，深受讀者歡迎，更在頭條網開BLOG，分享投資心得，累積點擊率已突破七千萬人次。

www.hkheadline.com/blog/index.asp