陸羽仁 - 五月沽貨走人？

陸羽仁‧逢周一至五見報 美國股市有句話叫「五月沽貨走人」(sellinMayandgoaway)，呢句話背後埋藏着股市的慣性，芬佬年初博表現，入市買貨，到4月睇埋第1季業績唔錯再炒一轉，甚至炒埋對今年整體業績的期望，所以到5、6月個市就要唞一唞，弄不好還要回番吓。上星期五美股又大跌，有啲美國媒體就好搞鬼咁話「4 月30日咁早就沽貨走人？」話呢個5月沽貨潮講唔定已經提早發生。

上周五美股早段還好好哋，但到咗中午傳出在紐約的聯邦檢控官，正研究會否對高盛證券涉嫌詐騙的案件作刑事調查，搞到高盛股價即日大跌9.4%，拖累美股急挫158點，杜指跌到11008點。

研刑控高盛美股急挫

美國政府和高盛鬥法，令金融股受壓，唔知件事點收科，投資者唯有避開吓。

美國政府點解祭出刑事檢控這一招，就咁大殺傷力？刑事唔同民事啦，若高盛打輸，董事會要負責，行政總裁LloydBlank-fein都可能有牢獄之災，唔係講笑，對高盛的衝擊會大好多。不過話得說回來，即使早前美國證交會只是提出民事檢控，美國法律界都話詐騙呢家嘢唔易證明，唔易告得入；如今講的是刑事檢控，刑事的控方舉證責任大好多，控方要「不留合理疑點」(beyondreasonabledoubt)地證明被告犯罪，才能令法官信納，檢控的難度好大。這樣問題就來了，既然美國證交會以民事起訴都唔係贏梗，點解美國政府仲話要從刑事方向出手呢？

股神玩嘢總統還招

我就話華盛頓?家同華爾街鬥緊法，玩緊嘢。美國總統奧巴馬力推的金融改革方案，上周四在美國參議院觸礁，投票結果是57票贊成41票反對，議案被否決，即係金融改革法案未上枱已經被打沉，亦是奧巴馬上台後在野共和黨首次成功拉倒法案。

這次參議院投票失利，一個關鍵是有一個執政民主黨的「反骨仔」倒戈，投票反對議案，呢個人係民主黨內布拉斯加州參議員尼爾森，阿森哥投票反對的理由明顯不過，因為股神巴菲特投資旗艦巴郡設在內布拉斯加州，傳聞巴菲特積極游說，要求豁免監管金融衍生產品，阿森哥自己就話「投反對票是反映州內商界對法案的關注。」奧巴馬推金融改革法案出師不利，仲係衰喺自己人手上，㷫到飛起，除咗發表聲明對參議院否決法案「深感失望」，自然會做啲嘢，向阻住佢金融改革的華爾街示吓威。若果早前美國證監會民事起訴高盛，已經特別揀好時機，係為金融改革法案推上國會鋪路的話，如今仲亮出殺人刀，聲稱要向高盛提出刑事檢控，一派要拉高盛啲大佬去坐監的模樣，自然係大力向華爾街施壓，叫佢哋唔好阻住地球轉。

政治事件困擾美股

咁郁高盛又和股神巴菲特有乜關係呢？原來股神在08年股災期間，巴菲特用咗50億美元買入高盛永久性優先股，保證每年有10厘息，仲送埋換購權，上次美國證交會一話民事起訴高盛，高盛股票由高位184.27美元，急插到161.96美元，一日唔見咗9%，等如巴菲特持有的換購權貼現值一天跌了10億美元，都唔好話唔傷，我估股神都幾肉痛。巴菲特上周六開巴郡董事會時親自出口撐高盛。由於巴郡揸重高盛優先股，而股神從來都有「賣花讚花香」的傳統，所以力挺高盛亦不令人意外了。

股神拉攏咗民主黨參議員尼爾森倒戈，目標唔係想同奧巴馬作對，只係為咗減少金融改革法案對華爾街和對高盛的傷害，以免再影響高盛的股價。但奧巴馬就忍唔到自己黨員倒戈相向呢啖氣啦，好，整多劑刑事調查你歎吓，這個消息一出街，馬上插低高盛的股票，高盛股價上星期五再急跌9.4%，收145.2美元，股神一晚再唔見近10億美元。奧巴馬想打到巴菲特驚，叫佢唔好搞搞震，等奧巴馬可以拉番民主黨參議員尼爾森回頭。

唔好以為我講咗咁多政治嘢，同股市無關，其實美股本來走勢幾強，但係就受兩單政治嘢困擾，一單係高盛案和金融改革法案，另一單係希臘危機，希臘借貸在今個月19日到期，唔能夠從歐盟借到錢就爆煲，但德國在呢個月9日有地區選舉，德國總理默克爾不願在選舉前同意貸款，所以左拖右拖，搞到上周美國市因此急跌，最新消息話希臘同歐盟終於傾掂援助方案，危機又會可以拖一拖。

股市大跌吸納良機

既然5月唔係咁風平浪靜，那麼「5月沽貨走人」的傳統智慧可否照跟？我又俾番兩個註腳，第一，據英國《金融時報》的統計，按西方股市計，「五月沽貨走人」的理論，由1980年至2000年，可以話都OK，因為只有50%機會由5月至10月股市有上升。而由2001年至2009年，呢個理論直情係錯，因為呢 9年由5月至10月，買股票有70%機會有正回報，相對地由11月至4月去買股，只有60%有正回報，數據叫大家唔好信呢個理論。或者我可咁解釋，4月美國公司出晒第一季業績，無乜嘢好炒，所以5月至6月歐美股市都會軟番少少，港股也受影響，所以有「五窮六絕」之說，但5月回軟也不是大跌市，過後又會炒番起，所以睇半年又唔似有問題。

第二，股市升得高先至危啲，按理美股?家危過港股和內地股，美股升上較高位，要回的空間大啲，港股升得少，內地股市直情試緊低位，當然會因為自身邏輯如調控樓市而下跌，但跌到咁上下論基本價值都比較吸引時，又會引來長線買家，令股市有少少支持。

綜合而言，在歐豬五國危機和美國監管銀行業的消息帶動下，股市調整吓一啲都唔奇，以港股現價而言，全面沽貨又似乎過敏咗少少，大市跌得深啲反而是入市良機，可以擇優吸納，坐吓貨等翻身。

hightea@hkheadline.com