陸羽仁 - 通脹市炒復甦

歐美市上日繼續炒上，亞洲市昨日普遍造好，但港股卻有少少落後，恒指高開199點後，先回後彈，下午內地股市升成2%，恒指受惠再扯上20,527 點高位，然後回順，收報20422點，升209點或1%。

昨日亞洲的大股市都幾得，包括祖國股市在內，內地上證綜指升2.1%，上番27 10點，日股升2.2%，台灣和南韓都有類似升幅，只是新加坡和泰國微跌。

定番神要買嘢

睇番港股，其實國企指數升1.9%，都追到內地的升幅，但本地銀行股唔得，滙控(005)料中期股本收益率將近15%，逆市跌1.03%；傳渣打(2888)購南非 Nedbank股權，股價先升後跌0.66%；恒生(011)無起跌，中銀香港(2388)升0.1%，隻隻腳仔軟。

中環茶友話，昨日港股力水未夠，但現時只是月中，未到港股發力的時候，一般都是在月中打後，特別是第三周開始走出方向。如果要佢買一邊，佢會買向上，道理好簡單，向上值博率高過向下。恒指近期高位是上月12日的22388點，低位是上周五的19699點，高低位相差2700點左右，在歐盟斥巨資入市後，港股短期內下穿低位的可能性大減，假設未來維持一個上落市，如今距低位只有700點多啲，向上空間有近2000點，單係睇位係博上好過博落。

我再補多幾句大趨勢，過去只有美國搞「量化寬鬆」，即係大放水，如今一向保守的歐洲都加入「量化寬鬆」的行列，換言之美國和歐洲都齊齊開水喉，意味着全球水頭充足，通脹會升溫。

?家仲有唔少人驚魂未定，怕歐盟方案止唔到咳，到佢哋定番神發覺歐盟大救市後歐洲唔會爆煲時，好多人都要搵啲嘢投資對抗通脹，雖然首選仍然是美股，但亦唔好對港股睇得太淡。

?家港股炒作的股份，都開始有「通脹市炒復甦」的概念，航運股係出晒名的周期股，當經濟復甦通脹周期重臨時最好炒佢哋，昨日好多航運股都大升，睇嚟唔止熱錢炒，都有唔少芬佬要補番少少貨。

大摩特愛國航

另外接近的類別是航空股，國泰航空(293)升2.3%，被大摩睇好的國航(753)升得更勁，大升6.7%，收7.62元。摩根士丹利話，國航首季業績較東航 (670)及南航(1055)優勝，其中國航擁有內地最多國際航線，將會是內地三大航空公司獲免徵國際營業稅最大的得益者；加上受惠人民幣潛在升值可能，以及需求穩定增長，故認為佢係首選的內地航空股，現時股價吸引，故將評級由「中性」調高至「增持」，亦上調其今年純利10%至87億元人民幣，每股盈利 72分人民幣，而基本目標價由8.9 2元上調至9.36元，已反映飛機用燃油每桶100至120美元，而「最牛」可上望10.61 元。

早前航空股、航運股這些周期股，跟住大市被人急插下來，昨日走勢簡直係拗腰式反彈，若然市場認為歐洲危機未解，甚至令環球經濟有再衰退風險，對這些股份就應該避之則吉，如今主力炒佢哋，卻明顯是預估危機會穩定下來，往後又會炒復甦了。