陸羽仁 - 內地滯滯哋

企業CEO陸羽仁‧逢周一至五見報前日美股大插香港唔係跌得好甘，昨日美股反彈香港又完全彈唔起，港股得個呆字，恒指早段上過21000點，但見過高位即插近240點，中段在20800點窄幅橫行，尾市再度向下。恒指收守20800點，跌48點，收報20763點，期指收報2053 4點，跌43點，比現貨大幅低水229點，大市成交略為回升至555億元。

拖累大市的元兇仍然係地產股，政府繼使出「九指十二式」後，市建局又配合推出八項辣招，更管謹規管與發展商合作的樓宇銷售，尤其是規定在簽訂臨時買賣合約後24小時內公佈交易，增加售樓透明度。發展商若不合作，可被禁止競投市建局項目6至12個月。政府出招後十大屋苑上周末的銷情再跌三成，市建局再落多三錢藥，本地樓市都會冷靜吓啩。

香港股市彈唔起，明顯同內地有關，內地A股勞動節假後復市，跌完彈過吓，下午又跌，結果上證綜指收2835點，跌1.2%。內地股市滯滯哋，令到港股都跟住發晒呆。

德銀話未宜咁快釣魚

講開負面嘢，不妨斬多四両，德銀大中華首席經濟學家馬駿就話，中國股市在未來幾個月還要遇上宏觀負面因素的「強勁對頭風」。預期生產物價指數(PPI)會升得幾厲害，在6至8月增幅會上到11%，而非市場預計的7至8%。而消費物價指數在6月會上到4%；另一方面，經濟增長(GDP)卻會放慢，因為基建投資和物業成交在第三季和第三季都會慢下來。所以到第二季末，「停滯膨脹」的擔憂會開始浮現。佢認為未來內地股市仍有壓力，?家未係在股市「釣魚」的時候。

馬駿講的是「滯脹的擔憂」，我覺得有此擔心不奇，但話中國真係會出現滯脹，我又唔太信，因為雖然阿爺出力調控住，內地經濟今年衰衰哋都有9%增長，咁樣唔會停滯，萬一真係有啲停滯危險時，阿爺只要放大一點水喉，搞多一點基建，又唔會真正停車，說到底內地未係全面對外開放的經濟，要谷要縮比較受佢自己控制。

馬駿講呢兩三個月內地股市未跌完，雖不中亦不遠矣。但作為長線投資者，反而應該從中找到機會，慢慢揀自己喜愛的優質股，慢慢低吸，唔係高追。我同中環茶友傾起A股的價值，上證綜指?家2800點，跌到2500點好未？都係跌多10%，但你願意長揸，買未來5年的中國經濟繼續好，又唔使驚得太緊要。

股神話中國樓市豪賭

內地真係麻煩啲係樓市，股神巴菲特在股東會後見記者，講到中國經濟問題，話中國人喜歡賭，中國樓市就是賭博，而且賭得很大，有一群人在大面積地豪賭，財富的增長應該是逐步積累的。

股神提到中國的強項與問題，佢話中國非常有效率，「如果我要在美國造一條鐵路需要3年，在中國可能只要6個月，在印度則要花上12年。」但巴菲特也提到中國買樓者盲目自信，導致樓價虛高，「我可以肯定地告訴你，中國也會面對泡沫和泡沫破裂，不管經濟發展有多麼迅速。」我又幾同意內地樓市升得太快有泡沫，且看呢次阿爺打擊炒樓有無效果，能否在泡沫未係太大時放吓氣。內房股昨日繼續跌，龍頭股中國海外(688)再跌1%，造14.66元，未來一兩個月內地樓市應該成交大萎縮，內房股有排捱吓。