陸羽仁 - 98年處境重現

港股以升市為7月作結，上周五恒指再升339點，收報20573點，整個7月大升12%，企在20000點樓上。

周末和一眾中環茶友品茗，暢論股市大勢，自然有人睇好有人睇淡，陸羽仁就提出98年股災後的經驗，讓大家參考參考。

97年香港回歸前，股市借助紅籌熱潮，炒上17000點，回歸祖國大家唔死得、生活如常的好消息兌現後，股市本已缺乏上升動力。福無重至，禍不單行，以索羅斯為首的一眾西洋大鱷原來已鎖定亞洲為狙擊對象，矛頭直指香港。佢選香港為目標有政治及經濟原因，經濟原因是聯繫匯率為固定匯率制度，沒有彈性，大鱷若能攻破聯匯，就如黃河決堤，有巨大效果。政治原因是香港回歸中國，失卻英國和美國的保護，港人未有管治經驗，「隊」你都未必識反應。

大鱷選了股市和匯市齊齊衝擊的雙途進攻策略，金管局初時為頂住港元匯價，把利息夾上300厘的高位，頂到匯價搞瓜股市，恒指一級一級咁落，97年10月開始崩堤，98年初一度反彈，到98年5月左右插到低位，低見5800點，跟住港府入市，買1000億股票，和大鱷惡鬥一番，結果遇上美國對沖基金長期資本爆煲，聯儲局為自救減息，變相幫香港，港股拾級而上。


暴跌後年半重見高位

陸羽仁還記得當時的感覺，初時唔信政府救市會得，因為包括聯儲局主席格林斯潘都話香港咁做干預市場唔會得，但唔覺唔覺，股市已升上7000點、8000點。後來股市反覆向上，這一段時間，就升穿10000萬點，那時人們開始由唔信到相信，覺得個市安全。再過一段時間，股市再升到11000點、12000點，股市有點熱度，已有人開始話要減貨，理由是股市由低位升番1倍，唔沽貨就笨啦。

結果係點大家都知，恒指98年見低位後反彈一年半，到2000年重上17000點的高位，話在11000點減貨的人，沽得太早了。

而家恒基主席李兆基話20000點以上分段沽貨，每1000點沽10%，沽到25000點沽一半就停，最後留一半，股市升上20000點，佢話開始沽第一注。問題係點解要沽貨呢？李四叔的手法，好似一些華資富豪炒期指的手法，我估個市升到18000 點已到價，升到19000點、20000點就過龍，好，你咁叻升上20000點我就開始分段沽你，又唔信你咁快可以升到25000點。


分段去沽似炒作

記住呢係大戶炒股的手法，普通散戶賭期指，在19000點沽，升到20000點輸1000點大部份人都打靶，唔係佢唔想賭，而係無錢賭，因為期指走向和自己賭的方向相反時，你要不斷搬錢去補倉，補唔到倉就俾人斬倉，但有錢佬唔單止有錢補淡倉，仲可以每升1000點再加大注碼去沽，一路加大，睇唔方向，最後可能坐番轉頭，假如最後升到21500點就跌番落19000點，到時佢平倉，開頭沽的19000 點倉唔使輸，20000點、21000點沽的就有錢贏。咁樣炒作是否明智係另一個課題，但散戶根本無錢學。

所以見高就沽，作為一種短炒手法，未必唔得，但假若手上有貨，聽到李四叔咁講，全面看淡，實行清貨離場，博個市暴跌再番，就有一定風險，呢種叫做「游水游唔番埋岸」的風險。

好多散戶鍾意「游水」，即係手上有股，即使想長，但見個市高，就沽出街，想等大跌再番，游水本來唔係問題，問題係遊錯「唔止蝕」。散戶通常對自己要求好高，想每一個細浪都高位出貨，低位番，有時個低位定得太進取，跌落去都唔到，回吐過後個市又上，沽貨買唔番，唔識「止蝕」，游水的「止蝕」係一旦睇錯，隻股無自己想像咁會跌或者無跌到入貨位，倒頭反升時就要去追番貨，散戶睇唔個市無跌得咁低，結果游一兩次水，手上清晒貨，所以游水有游水的風險。

講番李四叔那個「分段沽貨」建議，作為短炒策略無可厚非，作為長線投資的方法，就有少少問題，點解長線投資者要而家沽貨離場呢？


下插過深反彈會急

長線投資者最好手上長期有貨，唔好動不動就沽晒貨，在現今世代，下一波出現惡性通脹的機會，開始大過再出現金融海嘯，唔通走去買債券咩？我們在預期跌市時買債券，預期升市要買股票，因為債券雖然夠保險，但回報太低，例如香港政府準備推出的港債，利息只有2厘幾，買人民幣債券仲話博佢升值，買港債連升值都唔會，而家買房地產基金都有8厘、10厘息，買其他股票的潛在回報更高，點解要沽股票，放錢入銀行，或者買低回報的產品呢？

我開始覺得，而家股市的情況，有似98年的大跌市過後的處境，股市反彈不少，但不是離場的時候，港股低位去年10月27日造的10676點，反彈1倍是21352點。和98年股災後恒指彈上11000點時的情況差不多，短期覺得好高，都有點超買，但拉長一兩年睇，就遠未走到盡頭。人好得意，見過10676點，就高少少都唔想買。我反而有另一種睇法，去年底今年初是環球金融海嘯，若然止不住跌勢，股市會超跌，正路港股高位32000點，跌一半去番16000點都好甘，但結果跌到10676點，若果當時環球股市止唔到瀉，跌到5800點亦唔奇，所以當然怕風險唔敢買好合理，但10676點已經超低，當時無買，唔等如股市回穩升高後唔可以買，若升高之後反而安全，係唔係可以用正常一點的心態睇股票呢？睇佢地有無機會去番正常盈利水平，如果去番那些水平，合理的市盈率和股價又應該係多少呢？若細一點的跌市跌到16000點都好夠，現價距離16000點這個「理論低位」又未算太遠，未至於太離譜。

我有一個假設，若股市重見藍天，以現時資金供應比較充裕的情況，兩三年內恒指有機會再試32000點的高位，咁樣就係重複98年的情況，特別是港股的紅色比重愈來愈大，若中國明年重見11%增長，並以這個速度發展下去，絕對不能排除港股重上高位的可能。而家個市最大的敵人是泡沫急增，若果升三步回番一兩步，打好個底，就有機會一級一級咁上，反而一支箭咁向上唔回吐，你就要小心，咁樣的升市不能持續。較合理的發展是股市見高後會調整，回落番一兩成，抖氣，今年只是泡沫開始，明年才是最大泡沫的來臨。


實力股未開車

換一個角度，若出現比較壞的情況，港股會回試15000點，記住這是比較壞的情況，就是所謂金融海嘯回頭咬第二口的情況。若然環球經濟已經穩定，股市只是調整而非大跌，咁樣跌到17000點、18000點左右已經有大把人入市。

呢個市升上來，好多散戶唔敢買，特別是過了18000點之後，散戶不斷沽，甚至沽到清倉的大有人在，邊個去買？主要係各種類型的基金去買，基金持貨力較強，唔係話基金買完唔會跌，而係話而家唔係基金減持散戶狂那種癲狂局面，我反而見到一些芬佬，半年結算時出貨套利，之後個市再上，佢地反手再，但散戶游錯水去追番貨的較少。

唔好以為個市升咁多無好買，其實而家係指數股升得多，還有大量二線三線的實力股只是從低位略彈，完全未算開車，大可以慢慢發掘尋寶。長線投資者唔係要見高減持，而係要候低吸納，但買貨唔好一注買晒，分開慢慢吸，以免一買就遇上調整市，搞到自己無晒癮。