陸羽仁 - 中航科工有望修成正果

上周睇到中銀國際一份證券報告，講到中航科工(2357)，可以一談。

中 航科工過去一直大虧損，無乜人識，亦無乜人理，老外證券行無人做佢報告，但中銀國際一直都有跟進呢隻股票，過去對它的評級是「買入」，目標價是2.37元(上周五收報2.64元，已超越中銀的過去的目標價)。

剝離汽車業 務有改善

上周中航科工公布中期業績，中銀國際亦有出報告分析其業績，話中航科工截至09年6月底止中期報告中顯示，未計財務成本的中期經營虧損4.3億元人民幣，比去年同期的虧損3.2億多，但以持續經營業務計(即航空工業業務)，每股有0.001元人民幣的經營溢利，雖然唔係太大，但顯示佢剝離蝕錢的汽車業務後，可以扭轉過去3年巨額虧損的局面。

中銀國際話中航科工改組後中期表現明顯改善，佢地相信重組完成後，會將公司變成為一家賺錢公司。中銀國際相信中國的航空工業在未來5至10年，會有高盈利增長，特別是中航科工一直從事的直升機工業，所以佢會係一個主要受惠者。

中銀國際目標價3.3元

同時，中銀國際亦認為中航科工會係中航集團唯一的海外資本市場平台，預期母公司將會注入更多賺錢業務，而主要的風險係重組的進程等相關不穩定因素，而剝離中的汽車業務，對09年業績還有一定的影響。

中銀國際按中航科工最新情況調高對佢未來3年的盈利預測，估計佢營業額會先減少後增加(由於剝離體積大又不賺錢的汽車業務)，09年營業額158億元人民幣，2010年是114億，2011年是129億，而09年純利是1.5億，2010年純利是5.4億，2011年純利是6.6億。中銀國際以2010年盈利的25倍PE計，維持中航科工「買入」評級，將目標價由2.37元提高至3.3元。

憧憬母公司注資

老實講，即使中銀國際對中航科工未來盈利的估計正確，但以3.3元目標價等如明年25倍PE計，都係高PE。不過，中銀國際完全計唔到中航集團未來會注乜入中航科工，亦唔知中航科工要增發幾多新股去接貨(增發新股會攤薄每股盈利)，所以無得估，因此這25倍PE應是考慮了佢有注入優質資產的前景，才願意付較高的PE倍數。

未來要觀察中航集團注資的情況，若未來阿媽不斷注入靚資產予子公司，將估計變成現實的話，可以計出中航科工一個確切一點、正常一點的PE倍數，呢隻股就有機會由一隻投機股變成投資股，畢竟投資股風險應較低，回報亦會較為明確及穩定。