陸羽仁 - A股V形反彈玩死人

恒指昨日受外圍影響低開289點，跌至20,158點後回穩，中午前升番唔少，下午初段內地股市跌幅急增，恒指跌至20,143點後收窄跌幅，之後慢慢炒番上去，升到全日高位先至收工，收報20,435點，跌100點。期指收報20,468，跌74點，比現貨高水33點，成交97,829張。國企指數跌48點，報11,654點，成交減至565 億元。

昨日港股成交淡靜，成日個市被內地市左右。上午上證綜指跌80點左右，已經拖住港股大市。下午一點幾內地先開市，建行A股被人大手掟貨，下跌超5%，影響到興業銀行、招行A股等銀行股跟隨急跌，愈跌愈急，出現內地所謂「無量急跌」的情況，即係無人承接的乾跌，招行和浦發銀行沽壓最盛，一度接近下跌10%的跌停板的位置。銀行股大跌，就觸發地產、煤炭、有色、鋼鐵幾大類股份全部大跌，一度出現一種要錢唔要貨的人踩人局面，呢個時候剛好係2點半，就係港股下午開市之時，上證綜指跌160點，跌幅超過5%，港股開市只能跟住跌。


建行否認批股傳聞

不過股市經常有奇蹟，內地個市好似秋官套戲咁，在2點9開始，出現大奇蹟，由中石油和中石化兩巨股由跌轉升帶動，大市尾段急抽，傳聞話市場預期昨天晚上是成品油調價的時間，可能加價高達500元，所以令兩巨股急升，來一個V形反彈，最後上證綜指收復2900點大關，收報2915點，只跌77點，跌幅達2.6%。港股亦跟內地股市抽升，收復大部份跌市失地，由早上開市跌300幾點，到收市變只跌100點，咁樣V形反彈，亦玩死唔少淡友。

中環茶友話，內地股市中段急插由建行A股領跌，市場有傳聞話建行會批股集資，不過後來建行(939)發言人否認了批股傳言，穩定了股價。至於內地尾市由石化雙雄帶動，都有少少托番起個市的味道，因為佢佔股指比重較大，搞掂佢可以頂住個市。睇番香港H股，受惠加價傳言，中石化(386)升2.2%、中石油(857)則跌1%，而建行H股最低跌過2.3%，但收市跌幅大大收窄，只是微跌0.5%，收5.96元。茶友話，港股靜得緊要，散戶唔係點玩，大戶觀望睇內地股市何時跌定，所以港股無乜方向，跌近20000點邊好似跌唔落咁，但升到20800點左右又升唔上，上下浮沉。

碧桂園(2007)公佈首份「後海嘯成績表」，截至3月止中期純利18.2億元(人民幣，下同)，較去年同期的10.2億元增長79%，每股盈利11.14分，不派中期息；期內營業額增24%至92.03億元。


內房股先求量

碧桂園話，若不考慮因股份掉期而產生的價值變化，上半年純利為13.9億元，較去年同期14.59億元倒退5.1%。碧桂園去年2月與美林訂立價值最多2.5億美元(19 .5億港元)的股份掉期合約，碧桂園股價下跌就要輸錢，以今年6月底的市價計算，該股份掉期的公允價值收益為4.31億元，所以令碧桂園業績計多呢筆意外之財，不過呢份合約去年都已經累到佢輸唔少矣。

所以要拆開條數先睇到碧桂園的核心買樓業務係點，佢今年上半年房地產開發業務的經營利潤為24億元，較去年同期31.5億元，跌24%，但有關售樓收入按年升2 4.8%至86.48億元，銷售總建築面積按年升1倍，簡單講，面積賣多一倍，賺少24 %，可知樓價跌唔少(或者成本貴)，總之搵食艱難，碧桂園是先求量、再求價，積極去貨套現，我估其他內房股都唔好得好多。碧桂園昨收3.44元，升3.3%，可見市場認為其業績比估計佳。

另外東亞銀行(023)公佈，截至6月底止中期純利11.7億元，較08年同期的7.9 億元增長49%，每股盈利0.64元，擬派中期息每股28仙；期內經營收入增34%至49.5 1億。期內淨利息收入減少7.2%至32.3億元，非利息收入增加7.5倍至17.17億元，部份原因是交易溢利上升和金融投資升值所致；而淨服務費及佣金收入減少14.7% 至10.13億元。

東亞去年9月擠提，股價在去年10月和今年3月兩次見11元，東亞昨收26元，升1.8%，如今總算捱過海嘯，守得雲開，業績也開始好轉，雖然核心淨利息收入仲未係好好，但亦唔係跌得好緊要，主席寶哥哥話要做多兩年，才會交棒俾下一代咁話。