青心直說：炒林業改革見好就收

近月中央冇再推出新的產業振興規劃，中港兩地股市一樣Natural High Natural Buy，最新有溫爺爺於6月22日高調提出、再於昨天出版的《求是》雜誌中發表重要文章《高度重視林業的改革和發展》，相信市場又有新藉口翻炒。綜合內地媒體之解讀，呢次改革目的首要係提升內地林木業效益。因為目前內地43億畝林業用地、8億畝沙地和6億畝濕地，加起來面積比耕地多30倍，但產出率只係農地1/30。溫總相信，若然可以釋放呢增值潛力，將有助增加農民收入，從而拉動內需，振興經濟。繼十大振興產業後，中央似乎苦無良方，終於要落實埋林木業改革。但較令人摸不頭腦，係中央打算2020年達到全國森林覆蓋率23%目標，一方面要保育樹木，另一方面卻放寬採伐林木的審批及配額，並增加對有關行業信貸投放，提供不同程度補貼及稅務寬減。

行業基本因素未改善

既然中央「翻叮」救林木業，即時令人想起中國林大（910）、三林環球（3938）及兩儀控股（094）。先睇股價走勢，梗係兩儀跑出，因為市場憧憬佢大股東嘉漢林業會注入內地森林資產，加上去年佢打算蛇吞象，以40億元購入江西同福建約10萬公頃林地。雖然兩儀市值只有5億幾，但以佢粒粒巨星大股東背景（包括和黃前大班馬世民、淡馬錫、富達等），股價表述，呢單唔似係流料。能否子憑母貴，先睇後台。嘉漢林業除內地第一大林木區雲南有6萬公頃綠林之外，遠至黑龍江、近至廣州等8處加起來林木面積達34萬公頃，去年銷售1000萬立方米。唔好俾數「拋」到，其實同林大50萬、三林400萬公頃比，仍有距離。鬥多樹，就好似比較內房股土儲，其實最緊要仲係睇市場供求，到底有無機會令佢短期內轉虧為盈。睇番內地另一大林業股永安林業，半年盈利大跌33%，主要係因為房地產同家具市場需求急速回落，令市場競爭加劇，減價戰打到索晒氣。論投資價值，即使係樹多林大，全年轉蝕4億幾銀，可見行業基本因素未見明顯改善，炒林木股宜見好識收。反而新政策下，中央將推動農業保險，以上半年全國農險保費增近60%的勢頭，中國財險（2328）或有機會開闢一條新血路。胡孟青