投資的天空：牛市勿主觀看跌

如士佳在家裏晚飯，有時會偷空看看本地電視劇，同大家一樣，一邊看一邊罵，「錯完又錯，連份工都無埋，都仲咁固執，都唔知係咩人」等等，其實這些互動，帶給我們不少歡樂。財經雜誌有時都有異曲同工之妙，有時翻看一些訪問，令人啼笑皆非。日前就有一篇，謂未來一年內恒生指數有機會跌至14000點云云。由於目標價偏遠，自然吸引筆者追看。其實，看淡派亦有唔少專家，大市目標看多少，最重要是理據而已，綜觀全文，唔少數據你知我知，當中有好有壞，只係睇你點睇，而且很多數據在16000點時已出現，現在再重新搬出，似乎不合時宜，當中只有一個字較為客觀：「貴」，因為以往市盈率平均14-15倍，1997-2007是19倍，而現在是18倍，驟眼一看，確是非常貴，絕對有理據下跌，但當中破綻百出，最明顯的莫過於今次牛市本質的掌握，以前牛市是盈利帶動，而今次牛市明顯是流動性帶動，拿一隻豬同個計數機比，都唔知點比。

未上車多過已上車

當然，萬法歸宗，最後都要看盈利，但請看看1999年至2000年一個最搞笑的牛市，最後用點擊率來估價，虛浮程度較今天有過之而無不及，當時也要升高於250日線13個月，儲夠甕中之鱉，才令局中人如夢初醒。今天，才升高於250日線兩個半月，未上車的比已經上車的多，他們根本唔信這一次是牛市。再者，以上PE不盡不實，以歷史市盈率計，2007年最高應是24，2000年時最高為26，1994年則是22，1987年亦是22，今天18倍不到，屬高屬低？讀者可以自行判斷。士佳唔敢講股市即時唔會下跌，相反亦深信有調整，但牛市應去找支持，不要找阻力，是找機會趁調整時入市，而唔係等阻力，博大市跌。一日兩日升跌很難看清，但明年高位比本年高位高，筆者有十足把握，但士佳唔會死牛一面頸，若大市跌穿18000，就會放棄自己睇法，輸一成多只會重傷，唔會輸死。筆者唔係理論家，係炒鬼，大價股可以守一守，細股可以用上周五的最低價做基準，若收低於該水平，便應減注細股，否則調整時，倉位太重，自己嚇自己，貪字會得個貧。張士佳華富嘉洛證券投資服務部董事