青心直說：中國煞車後果堪虞

工業和信息化部發表報告預測，內地全年工業增加值可望最少有 11%增長，正值經濟企穩回升的關鍵時期，呼籲政策救市唔可以「急煞車」。的確，睇番內地重工業，就以中國鋁業（ 2600）為例，管理層在業績會上透露，無論氧化鋁定係電解鋁的開工率，已分別回升至 70%及 90%，出廠鋁價亦已轉虧為盈，下半年有望恢復盈利。經濟最壞時刻過去，已是各國政府統一的官方論調，不過，中央高層部門對經濟問題各執一詞，呢邊工信部叫唔好停，嗰邊人大財經委副主任委員吳曉靈警告，唔盡快控制貨幣信貸增長，將會令中國面臨長期通脹。溫爺爺唔理下面打餐死，高調重提有保有控的金融政策，按重點產業調整。正如施老闆話齋，喺內地封閉市場炒股係零和遊戲，資金唔會外流；樓起多咗第時實有人住，亦都唔係問題；只要兩者繼續產生財富效應，就能夠以銀彈換時間，調整行業產能、整頓官場歪風、完善法制，等經濟走出 ICU時，有良好基本因素支撐。

內憂外患隨時爆
不過唔好以為內患咁易解決，一大例子係鋼鐵業的內外受敵。外面俾原料供應商㩒住嚟搶，入面行業鬼打鬼，中鋼協儼如冇牙老虎，中鋁亦估產能過剩要 3年先搞惦。以中國目前國情，等唔等到？從去年中央陸續推出救市措施以來，資金先係流入股樓，據講有超過 2萬億元人民幣，另外大部份工程基建資金到位速度慢如蝸牛，至今一年時間先見到工業增加值改善，顯示喺呢條救市食物鏈，由進食至消化到化成養份至少要一年。去年 8月以來，內地 7次上調出口退稅率，機電、高新技術、紡織及服裝等產品已接近零關稅，過去 9個月出口仍繼續跌，雖然 7月跌 23%叫做少咗，但主要係由於基數細效應。嚟緊要金睛火睇實 8、 9月聖誕付運旺季，係咪真係有好消息。救市措施初見成效，又臨近建國 60年大日子，洗濕咗頭的政策大方向唔會有變。問題係隨住經濟改善，退市機制呼聲不絕於耳，以色列已率先加息 1/4厘。全球加息周期重臨之前，夠唔夠時間畀中國療傷？最怕係外憂未好，內患難癒，調低未來經濟增長目標，後果對全球都肯定係災難性。胡孟青