魚缸暴炒族：內銀股買貨稍等

美股道指上周五急升 155點，收 9505，創 9個月以來高位。升市原因之一，係歐美央行及有份量之經濟專家不約而同地表示，經濟已經走出衰退。美股轉強，唔少好友認為，道指後市可以反覆上試 1萬點。不過，港股近期表現偏弱，恒指已跌穿 20日線，估計大市要回試 50日線 19200水平，今次調整才會完成。美股上周五神勇，將有助港股今日高開，最怕係內地 A股唔爭氣，港股又再先升後跌。內銀股上周進入業績高峯期，最多散戶擁躉之一的工商銀行（ 1398）中期賺 664億元人民幣，按年上升 2.9%，每股盈利 0.20元，但不派中期息。

工行 4.8--5元收集
有股友話失望，其實工行上市至今未曾派過中期息，有乜好失望？該股上周五微跌 0.03元，報 5.24元。鑑於近期港股表現一般，工行料仍要調整，可等跌至 4.80元至 5元才收集。中國銀行（ 3988）本周四公佈業績，該股上周五跌 0.03元，收報 3.76元。中行都係嗰句，買貨宜稍等。方星俠