陸羽仁 - 隔夜油條無火氣

在美股杜指上周五勁升150幾點帶動下，亞洲股市早上全線高開，日股升幅尤勁，恒指昨日高開451點，升至20,650點，一開已接近全日高位，後來受中移動弱勢拖累而回順。下午開市一彈就回，一度低見20,434點，尾市再回升，收報20,535點，升336點，升幅1.7%。期指收報20,542點，升404點，比現貨高水6點，成交80,947張。國企指數升238點，報11,703點，升幅2.1%，高過恒指升幅，大市成交只有622億元。

日股昨日大升3.4%，但期指在9點45分一開20744點，升606點，已經係全日高位，到10點現貨開市，期指已經唔見100點有多，之後反覆尋底，跌又唔跌得多，似係種炒唔起跌唔死的格局，或者要歸因於內地股市無乜火力，A股早兩日反彈，昨日升1.1%，無乜炒作氣氛，托唔起港股。

中環茶友話，早兩個月內地A股和港股跑在前頭，跑贏美股，當時本地銀行結餘不斷增加，反映資金流入。近排內地股市回落，又唔見金管局入市接美元沽盤，即係話唔見有新水流入，所以港股有點似隔夜油炸鬼，無乜火氣，只係跟外圍交功課，跌時唔係跌好多，但升又升唔起。


中移動上A難大插

可能有人話昨日尾市都上番100幾點，大市唔係咁弱，但茶友話，昨日期指一開就開高606點，開咁高引好多人沽，沽盤在3點內地收市後見無乜特別壞消息，就要平倉，只係呢平倉盤拉番高個尾市，唔代表有特別好消息。美股創新高，但港股無力上高位，未來都似跟外圍炒上落，但又未必跟得足。

港股升得唔多，小部份原因和重磅股中移動(941)唔掂有關，中移動逆市跌1.2 %，破埋80元大關，收79.05元，中移動第2季業績近年首現倒退，令人分唔清究竟係金融海嘯影響，未來會雨過天青，還是中移動面對競爭，開始步入低增長期。幸好昨日中移動成交只有33.5億，也是一般成交數字，即係唔見大量沽盤，但沽空榜中移動就排第一，有3億元沽空，即係話成交中有一成左右係借貨沽空交易，呢班空軍睇淡中移動後市。

不過有芬佬同我傾起，話中移動公佈的業績無乜睇頭，部份人計數離場，但大家明知佢可能係未來第一隻回歸A股的紅籌巨股(而家傳中海油(883)係第二隻)，一成事都相當刺激，佢公佈埋中期業績後又有一排無業績睇，所以等個市跌定，等睇基本因素的沽盤去清後，又睇唔到中移動有大跌的風險，所以佢就唔急住沽啦，佢話到中移動上A股炒高之日，才是沽貨之時。

呢位大哥仲記得2006年尾國壽上A股前夕，香港H股由17、18元，一條氣炒上去，到2007年1月3日國壽A股掛牌的早上，香港H股炒上28.8元，佢就係高位出貨，之後隻股就碌番落去，咁輝煌的戰績，佢老人家現在仲記得，話想博中移動歷史重演。我估歷史會唔會重演無人知，但又有不少人有此憧憬，候低會買。


內銀股等加息

內銀股陸續公佈業績，隻建設銀行(939)就有人睇好，昨日升2.6%，收5.99元，跑贏其他內銀股；建行半年賺558億元人民幣，和去年同期比較下跌5%，但從其第二季業績看卻優於同業，摩根士丹利話，建行半年業績符合預期，預期佢收入會增多，故調高建行09至2011年未來3年盈利預測1%至2%。

建行上半年淨息差2.34厘，比去年同期的3.16厘，低0.82厘，大摩話，建行第二季淨息差已經見底，若未來中央決定加息，可能拉闊息差，對建行毛利有幫助；建行內部資金足以支持其一級資本充足比率。大摩維持建行「增持」投資評級，目標價由6.84元，微升至6.88元。相信係受到大摩等證券行睇好的刺激，建行昨日升到5.99元，若果你信大摩，現價距離目標價尚有15%空間。

國土部稱下半年嚴查囤積而未建的土地，但內房股真係好，繼續反彈，中海外(688)升5.4%、華潤置地(1109)升3.7%、碧桂園(2007)升3.4%、合生創展(754)升3.17%、雅居樂(3383)升2.3%；一路話有地未開發的富力(2777)只升0.8%，睇都有壓力。