陸羽仁 - 泡沫市不要「拗頸」

陸羽仁今期想再講講泡沫市這個話題，目前的股市就好似飲啤酒一樣。

啤酒無泡沫唔好飲，在大跌市過後，股市一般會死氣沉沉，就如一杯隔夜啤酒一樣，一點泡也沒有，飲都飲唔落口。正常的一杯啤酒，面頭浮一層泡，飲下去冰涼可口。若然啤酒急倒落杯，杯內三分二係泡，三分一係酒，一啖飲下去，初時覺得好好味，但一兩秒過後，才發覺成口泡，就有少少被搵笨的感覺。

如飲啤酒有泡更「和味」

因此，可以有以下幾點總結。第一，目前出現的是泡沫市。因為資金供應太多，購買者一開始就搶貨，形成股市的泡沫現象，股價好像永遠較「合理」地高，回吐永遠較「合理」地少。香港股市在3月9日見低位11344點後，升到6月12日的高位19161點，大升7817點，這種升幅本來已經相當大。

在6月見高位後，看走勢是「理應」逐步回吐，應有較深的調整，但7月13日見低位17185點(期指一下沽4000張，插低指數那一天)後，即刻拗腰向上，唔肯再向下調整，已完全顯露資金搶貨的現象，結果係再創新高，升穿20000點，所以現時市況不能當一般跌後反彈市，甚至牛市初期來看待它，要明白股市在資金驅動下出現泡沫，才可以理解佢升得多、跌得少的特質。

?實中美「印銀紙」政策

第二，股市有泡比無泡好，無泡的股市，可以把所有人、包括長投資者嚇走，股市感覺太差時，長投資者都情願買債券而唔買股票。有泡，人人都會開心，好似依家有新股熱，借錢大手認購新股，在上市第一天沽出，可成為簡單的投機法。

第三，有泡的股市不等於馬上會瀉，泡沫伴隨股市而生，有泡反而係正常，問題是泡沫有多大、漲得有多快而已。好多朋友喜歡靜態地看股市，問在甚麼點數見頂？我喜歡動態地看股市，特別是這種泡沫市好難靜態地分析。

既然香港泡沫市的來源是中國和美國大印銀紙，只要它們印銀紙的行為不變，股市只會有調整，無大跌，所以要先看這些宏觀環境有無變化，例如通脹會不會急增、美國幾時開始加息、中國會否宏觀調控等，在這些變局出現前，還可以享受「泡泡浴」。

暫未失控或玩到明年

第四，過分失控急升時，就要小心。除了睇政府行為，亦要睇市場行為，港股至今的走勢仍未算好唔健康，我睇呢個泡沫市可以玩到明年，係假設美國經濟在今年第4季才有明顯改善，數字在明年初出來之後，美國宏觀政策在明年初才慢慢調整。不過，如果股市發狂急升，例如內地股市兩三個月內重上6300點的高位，或者港股兩三個月內重上32000點(這只是假設，不是估計)，圖表上如幾枝火箭射上天咁樣，就真係好難維持得耐，等於你一兩秒內把成支啤酒倒落杯，一定會爆瀉。老實說，我過去從未見過這種全世界狂印銀紙兼短期內唔怕通脹的股市，對呢種股市無乜經驗，亦唔敢講佢的走勢，但確認這是一種泡沫市，就會明白其基本方向。我只係想話畀大家聽，無論你覺得佢升得幾唔合理都好，唔好同佢對抗，假如你以為佢會大跌，天天走去沽佢，佢中間或有短暫而急促的調整，但你睇得太淡，唔識食胡，大市轉眼又升番，你買錯就更加大大鑊，佢或者一年後會爆煲，但在此之前你已經死先啦。