陸羽仁 - 熱炒不忘基本因素

近日市場出現經濟差、股照炒的情況，但大公司派成

績表就見真章。

國 泰(293)上半年轉虧為盈，純利8.1億元，表面上係扭虧為盈，比去年同期虧蝕7.6億好好多，但實際上唔係好，只係好運。熟悉國泰情況的老友解釋，國泰條數好番，主要係期油對沖合約產生20億按市價計價的未兌現利潤，呢條數係同油價回升有關。

國泰扭虧好 「表面」

油價去年狂升後急插，國泰做長期對油的期油合約帳面蝕到阿媽都唔認得，今年油價反彈番，張合約帳面就變賺錢，填番日常業務筆數有突。不過，正如去年全年油價對沖產生的86億虧蝕係紙上虧損一樣，呢20億盈利亦是紙上富貴。若不計對沖油價的紙上富貴，國泰上半年其實有7.7億元的經營虧損。

國泰深受金融海嘯打擊，加上早兩年好景時訂了不少新飛機，新機的折舊開支殺到，更加係百上加斤，佢上半年營業額跌了27%，當中客運業務跌了23%，這種業務收益跌20%。貨運業務更大鑊，跌了近40%，收益跌了33%。業務急跌令今年上半年流失現金12億，債務對資本比率(debt/equityratio)由0.69升至0.81，所以國泰唔派息來減債。

博反彈揀「 瘦身」股

在公布業績後，證券商德銀及瑞銀下調國泰的投資評級，指核心業務前景仍然疲弱，但摩根大通仍看好前景，指運量可望回升，綜合九間證券商最新予國泰目標價介乎9.2元至15元。美銀美林亦發表研究報告，話國泰上半年核心業虧損35億元，顯示前景仍然疲弱，兼且燃油成本有上升趨勢，維持「跑輸大市」評級。國泰係航空類股份中的強者，但受金融海嘯衝擊，其股價跌幅比起生意跌幅，已經算係好溫和，之前仲跟住個市炒上。國泰由3月低位7元，升到8月5日的高位13.3元，升到差不多1倍，直到上周四公布業績前就開始插，上周五收番11.12元

因此，我跟住大市炒股，亦不能不留意基本因素，有些行業在金融海嘯中急跌，但海嘯一過，可以快速反彈，特別係海嘯中曾經大量節約成本的「瘦身」股。國泰最大的開支除了油價和飛機折舊外，就是飛機師和空姐的人工，但未見國泰可以大減開支，所以佢要回升，除了希望油價低企外，主要期望經濟向上。其他航空股甚至航運股都有相似情況，從炒股角度看，只要有資金流入，股價就可以炒上，但最後講到生意有無錢賺，就唔係咁易復甦。

公布業績恐 打回原形

航空股情況比較係好，航運股的主要生意同出口貿易有關，和航空股的貨運情況類似，但航運股更大鑊的是早兩年有大量新船定單，今年開始是新船落成高峰，供應多遇上生意少，不過大市急升，航運股早前在資金追捧下，有理無理已經撩高，最後到公布業績時，都可能同國泰有類似的命運。

最後講多句，建行副董事長張建國上周話，建行睇到新增貸款有風險，所以下半年會削減70%新增貸款，建行下半年會借出2000億元人民幣，比上半年的7085億元大幅減少，估計建行這個講法對內銀股和大陸股市仍有壓力。