投資的天空：危前博有機

早前筆者指出 A股弱美股強，成了拉鋸之局， 8月份很大機會在 19500-21500之間遊走。 8月期指最高見 21210，最低 19780，其間個別中小型個股跌翻天，看來很差，另一方面，的確出現唔少壞消息，以指數的表現，投資者又顯得相當冷靜，當然，可能係大戶想托住指數沽貨，所以在期指結算前一日中央出口術，筆者就說要多等一日，一來市場可能未來得及反應，二來結算在即，大戶可能想萬大事都多等一日，果然星期五就展開了跌勢。周五雖跌，但筆者估市場人士傾向認為溫總只係口硬手軟，為了保持經濟增長，應該唔會有重手動作，基金大戶亦按兵不動，跌得仍算有秩序。

其實，當日大市升穿 16000，筆者謂全力看好，但當時大市足足橫行了一個半月，不少投資者選擇離場，指數就突然狂飆上 21000水平，士佳亦差點補唔切貨，試問現時大市照樣橫行，又有誰夠膽貿貿然沽貨？所以，基金大戶現時應是屏息靜氣，一於你唔走，我唔走，只是如果突然有些具份量的資金離場，就可能會牽一髮而動全身，大夥兒集體沽貨。讀者會問，咁點算好？筆者會用一支陽燭做測試，試想市場上出現咁多壞消息，也可以做出陽燭，可能代表有人開始買貨，大市有機會已見底，筆者會入市買貨。不過，如果陽燭之後，大市未有上升，反而跌穿近期低位，即連試水的投資者都敵唔過市場力量，就有機會出現較深調整，到時筆者便會走貨，而且走的不但是撈底的新貨，還有一直持有的舊貨，當然，牛市的大方向未改，只是筆者在 16000點起看好，如果大市要跌得深，便不能逆市而行，就當是牛市之中一個小型止賺位。根據以往經驗，此法成功率只有 30％左右，有 70％機會大市會再度下跌，但撈中成功所賺，卻遠大於撈底失敗所蝕，大概是三一之比，即撈底預期回報為 0.9（ 3X0.3），預期虧蝕 0.7（ 1X0.7），這是值博率及成功率的分別，所以，仍然有可為。現在港股已到關鍵水平，一旦大市出現陽燭，筆者就會博短期底已見，重新入市，如大市再穿底，到時出現較大調整的機會便會增加，即使唔走晒，亦應走掉一半持貨。張士佳華富嘉洛證券投資服務部董事