陸羽仁 - 精選股份好過大大棍

上周五期指結算日，港股續跌，力守20000點收市，沽售壓力未消，投資者觀望情緒轉濃，成交相應減少，今日係八月份最後一個交易日，開市相信會維持反覆格局。

美股最近相對表現強勢，連日挑戰海嘯後高位，杜指在連升八日，續創今年新高後，上周五後勁不繼，即使全球最大半導體製造商英特爾唱好銷售前景，戴爾電腦次季業績較預期佳，亦只能令納指力保不失，杜指及標普指數雙雙下跌，杜指跌36點，收報9544點。分析員憂慮未來數周若無重大利好消息，美股升勢難持續。不過，著名基金經理巴頓碧斯(BartonBiggs)對美股前景則看法較樂觀，認為全球經濟將在新興市場帶動下復甦，全球股市仍有上升空間。


華爾街熱炒喪屍股

碧斯認為全球經濟將在新興市場帶動下恢復增長，預期包括美股在內的全球股市過去六個月以來的升勢，仍有餘未盡。

華爾街股市氣氛近日轉呈樂觀，流行話題係市場使用槓桿投資似乎有增加跡象，過去無論投資者抑或炒家，美國以致整個西方金融市場最大危機來自所謂去槓桿化，即係減少使用借貸投資，由此觸發的衍生工具爆煲潮，令到投行無法再大舉借錢進行收購或炒賣，資產價格隨之收縮，情形一如天文學上星球大爆炸後急劇收縮，形成黑洞，究竟而家黑洞是否已經開始消失，金融界的宇宙回復擴張呢？呢個問題就算未有答案，但已經惹起部份人的無限憧憬。

中港股市陰陰跌，美股反而相對硬淨，指數去到高位，炒風蔓延去炒金融殘股，好似AIG同兩房股份，連續幾日發飆上升，市場估計係同夾倉有關。不少識計數之分析家警告，這批殘股一旦跌起上來唔係人咁品。

呢批金融殘股，根據專家講法，大部份資產已係金融海嘯中輸乾輸淨，?家要靠政府撐住，就算資產價格回升，權益都唔再屬於股東，即係話升市唔關股東事，所以根本無實質因素支持升勢。套用香港術語，呢批可以話係華爾街喪屍股，只係得番個無靈魂的軀殼，但呢批喪屍股當年都係威震一方的大公司，市值大，流通量多，所以插落時好多金融兀鷹飛落搵食，沽空股份獲利，不排除咁樣累積一大批淡倉，現在炒家趁個市好番，就有理無理狂夾淡倉，令呢批過氣藍籌出現強勁的喪屍彈。


阿爺關注產能過剩

中環茶友話，美國喪屍股彈彈跳，從好的一方面睇，可以話外圍金融市場的風險胃納改善，炒家肯出來冒險，銀行借貸融資亦鬆手好多，所以先至有熱錢流入去，搞到喪屍都翻生；但從壞的一方面睇，呢批喪屍股炒得咁緊要，好似AIG 股價連升九日，收報50.23美元，升百分之五，創去年十月以來新高。美國分析員唔信邪，紛紛發表看淡言論，質疑呢隻喪屍股彈番上去幾十元美金，點計都係超晒值，一旦跌起上可以好恐怖，隨時仲會拖累到大市氣氛，咁樣玩法玩得幾耐，都幾令人懷疑。

市場另一個焦點，係中央政府提出關注產能過剩，特別係資源部門，認為有需要採取行動糾正，消息令到資源股上周股價受壓，有股評家阿爺的言論反而提供低價掃貨的機會，不過，中環茶友認為，散戶係入市執平貨前，最好先睇清楚形勢，因為阿爺今次咁講，並非好似藝人講「棟篤笑」，是旦，部份外資專家，亦一早覺察到中國產能同庫存過剩的跡象。

以鋁材為例，中國在今年初在國際市場大舉買入鋁材，據專家估計，今年三月至五月，由於內地係國際市場大舉買入鋁材，令到原本急跌的鋁價回升接近兩成，甚至銅價亦受惠大升。本來美國房地產市，建材需求急跌，鋁價應該跌到四腳朝天，但最後在中國掃貨下出現反地心吸力現象，但付出代價係堆積在內地倉庫的鋁材不斷增加，粗略估算現時在鋁廠、貿易商同庫存的鋁材，共達六十萬公噸，數字遠超上海期貨交易所公佈出來的水平。

點解內地要係鋁價原本大跌市掃高價錢呢？相信答案不是好似超人咁想救地球，而係中國認為本身即將進行的龐大基建對建材有極高需求，同樣認為在自己資源缺乏下，盡早儲存大量資源係保障利益的最好方法，所以實行人棄我取的策略，但經過一輪吸納後，阿爺似乎開始意識到，假如繼續以目前的速度積聚建材，好快就會面臨無法消化的難題，所以採取煞車措施，似乎是最合適的有效措施。


資金可能跟隨轉向

上個星期，國務院總理溫家寶提出的產能過剩問題，反映了中央當前政策可能面臨轉向，涉及的範圍會有多個領域，鋁材只係其中之一，其他好似水泥、鋼鐵都一樣，仲有就係最近炒作得好熱的另類能源，譬如風能，就項目上馬都受限制，以免一窩蜂效應，令日後形勢失控。

茶友話，中央的宏觀政策不斷微調，加上美國開始炒復甦，會否令上半年全球資金投向中國的熱潮降溫，暫時仲無定論，但就算熱錢大方向不會有一百八十度轉變都好，至少流向會變得有選擇性。

資金不會全面追捧同中國經濟有關的股份，揀股會變得比跟住大方向來得重要。根據上星期已披露半年業績的1105家公司，累計實現盈利同比下降2.27%，但第二季度實現盈利就較上季增長31.6%，清楚見到業績好轉的情況。換言之，內地經濟環境仲係容許企業有不俗的增長環境，關鍵是在粗放式的增長下，絕大部份企業都可以交到好成績，但當粗放式增長不再，增長只係集中個別環節，就只有相關同經營得好的公司，可以保持良好業績，點樣揀出未來仍能維持出色表現的公司，買入他們的股份，會是決定投資成敗的關鍵。

上半年係資金市，基本上同內地有關的公司都全面上升，投資者最重要決定係入唔入市，同埋入市力度有幾大，這段時間內如果有入市，基本上都可以成為贏家，勝負關鍵係力度有幾大，大方向係買得愈重手就贏得愈多，至於揀股眼光，反而只係次要。但第四季情況好有機會改變，買得多未必贏得多，最重要揀中有潛質的股份，揀到好股可以在調整出現時減低損失，上升時賺取更大利潤，這比大大棍扑落去風險少而效益大。


炒變身股留意風險

面對大環境轉變，未來資金有機會由資源、內銀股流向其他股份。中央期望維持經濟熱度，但擔心產能過剩惡化，政策會不會變成減少投資，改而更進取地催谷消費呢？如果答案係會的話，資源股就會無運行，反而內需股就會有得益。

茶友又提醒，近幾個月好多股仔炒變身，業務新方向係迎合中央政策，聲稱會注入相關的業務，好似開礦、新能源等，但如果國家政策調整，結果可能係這些炒作藉口不再受市場歡迎，又或者一哄而上的投資大計，無法獲得政府支持或審批，使到變身大計無法實現，所以手頭有這類變身股的散戶，呢排真係要打醒十二分精神，一見情況有變就要識得執生至好。