陸羽仁 - A股試底拖後腿

港股昨日被內地股市拖住向下，A股低開，日中更一度創年內新低。港股亦無乜運行，恒指收報21262點，跌325點或1.5%，抹去了上日的大部份升幅，成交仍然偏淡，只有603億元。期指收報21258點跌248點，比現貨輕微低水4點。國企指數跌210點或1.7%，報12171點。

地產股昨日又唔掂，證明上日之升只是反彈，並非轉番強。中環茶友話，美股升咗咁多，雖然仍然氣勢如虹，但係都令人有少少戒心，內地股市在調控樓市聲中又唔掂，試今年低位，外圍無刺激，港股自然地受壓，昨日都算跌得有因有由啦。

上證2 7 0 0 點有支持睇番內地股市都有啲啟示，上證綜指一開市就插，主要由內銀股和內房股領跌，收報2907點，下跌61點，跌幅2.1%。中環茶友問我睇內地股市跌到幾深，會唔會跌到2500點，我話唔會跌到咁深啩。內地第一季GDP增長有11.9%，全年經濟增長好大機會有10%以上，A股企業盈利有望增長20% 以上，唔使睇得太淡。不過，跌開有條路，試吓2700點、2800點唔出奇，但到呢啲位就有較強支持，可以分段見低吸納。

如果從宏觀角度講，最快在第二季內地已可能開始加息，亦有可能將人民幣升值，對股市一個利淡，一個利好。中外專家都估人民幣好快升值，有「日圓先生」之稱的榊原英資認為，中國很可能會到6月份讓人民幣升值5%(多過內地一般估的3% )。另外，國際貨幣基金會亞洲主管辛格(AnoopSingh)亦表示，中國為國內經濟的利益，或會在「中期內」允許人民幣升值。我估中國容許人民幣升值時，香港H股亦因升值而受惠。

藥股有啲炒味

大圍股市難炒，資金繼續炒新股的影子股，昨日輪到醫藥股，專科醫藥集團朗生醫藥(503)昨日起公開招股，帶住部份藥業股炒上升。有份跟炒的中環茶友話，炒影子股係極短線行為，升得多那些佢即日鮮就走。

講番隻朗生醫藥，光大證券話佢估值進取(即係較貴的代名詞)，但建議投機性認購，光大報告指，風濕免疫病西藥產銷商朗生醫藥招股，擬按股2.95元至 3.91元上市，集資最多5.53億元，以朗生08年售額計，佢銷售的產品在中國的風濕病市佔率達22.8%，有自己的品牌藥品。據招股書預測，其今年上半年每股盈利為9.3仙，若好簡單地假設下半年同樣賺9.3仙，即全年賺18.6港仙，以招股價2.95至3.91港元計，下限估值仍達15.8倍市盈率，高於規模相近的武夷(1889)的6.3倍市盈率，指朗生估值進取，建議投機性認購。

光大雖然話佢貴過武夷藥業咁多，仍然話可以投機性認購，都顯示內地證券商認為隻嘢有少少炒味，佢都可以投機性認購，又難怪武夷藥業可以投機性先炒一炒了。

中國銀行(3988)公布截至 2010年3月底止首季業績，純利262.3億元(人民幣，下同)，較去年同期的185.7億元增長41.23%，每股盈利0.1元。證券同業平均預測中行首季純利約249億元，如今公布是262億，優於證券業估計的平均數，可見內銀股的生意唔係咁差，但第二季開始收緊樓市貸款，影響在次季業績先至體現出來。