青心直說：電影票房測股價

電影金像獎過後，多咗聲音話香港電影業重生，希望唔使靠中港兩地合資都可以喺內地打出一片天。講真，咪就係睇中內地電影市場呢塊肥豬肉想獨吞。記得內地創業板開板時，曾提過有美國「華納兄弟」影子嘅中國「華誼兄弟」，股價由 28.58元（人民幣．下同）炒到上最高 91.80元，到家都未使破發。公司估計，以目前內地電影業發展速度，最快 6年行業規模可達 300億元，因為按去年票房 60億元計，單係今年首季票房收入已超過 29億元，今年好有機會破百億。文化產業板塊間唔中會被炒上，好似下周一出業績嘅橙天嘉禾（ 1132），仲有帝通國際（ 8220）、意馬國際（ 585）、第一視頻（ 082）等，雖然炒味濃，發展卻越嚟越似模似樣。
文化中國泊大碼頭

香港買唔到華誼，反而可以睇睇前身係上聯水泥嘅文化中國傳播（ 1060）份業績。公司去年由盈轉虧蝕足 2.25億元（港元．下同）。點解業績睇落咁差，股價都唔點跌？睇真啲盤數，去年因為出售上聯水泥業務，錄得 2.02億元虧損，若果扣除呢筆公司轉型開支，只蝕 2287萬元。睇埋去年部署，轉型唔似講玩。公司去年起總共做咗 7單收購，最大宗要數 2.19億元入股京華文化。京華擁有《京華時報》及《京華網》，同官方人民網關係密切，喺北京早報市場有超過七成份額。去年 12月，公司同人民網成立合營公司營運手機電視，中國有 6億手機用戶同 2億網民，三網融合就係要將佢哋一網打盡擸晒返嚟。至於去年電視電影業務有些少錢賺，收入 4575萬元，盈利 503萬元；手機及網絡遊戲仍未有太大起色，淨現金 1.27億元。公司去年兩度配股（ 0.27及 0.52元）及供股（ 2供 1）集資，今年表現要視乎有周潤發加埋葛優主演嘅大片《讓子彈飛》收唔收得，否則可能又要問股東攞錢。胡孟青