陸羽仁 - 追風逐影的日子

恒指跌得多都跟外圍彈吓啦，美股上周五創咗新高，港股昨日算做有啲力水，出現啲像樣反彈，開市無幾耐就升，最高上過21650點左右的高位，後段略回，但恒指都收21587點，升咗342點，現貨收市後期指弱啲，插咗成百點，收2150 6點，只升257點，由成日高水變成低水81點，下月期指更大低水322點。

地產股在今次政府打樓市的「9招12式」中首當其衝，跌咗唔少，昨日終於有番啲反彈，升得最多係恒地(012)，佢公佈2月底物業重估盈餘440億，股價急升4.3 %；其餘信置(083)升3.1%、新地(0016)升1.7%、長實(001)升0.92%。地產股叫做唞吓氣。

今次真係打老虎

在美國證監會出手打大老虎高盛之後，香港證監會終於出手打老虎啦，不過真係打「老虎」，針對大炒家羅伯遜旗下的老虎基金亞洲，話佢在 08年底09年初中行(3988)批股前，利用內幕消息事先沽貨，其後又在建行(939)批股前沽貨，申請凍結老虎基金亞洲3000萬美元資金。

講起老虎基金大家應該好熟，97年亞洲金融風暴時，除了索羅斯的量子基金之外，老虎基金都有沽空港股和港元，最後俾港府入市夾番轉頭。但當時那些對沖基金合法操作，政府耐佢唔何。今次捉到老虎基金涉嫌內幕交易，自然出力去打。

從高盛的涉嫌詐騙到老虎基金懷疑內幕交易，都可見呢啲「大戶」玩轉市場的身影，佢哋錢又多消息又多，神又係佢鬼又係佢，散戶要賭贏大戶，談何容易。

打電話同個操盤的中環茶友打牙骹，問佢做緊乜，佢話會認新股歐舒丹(973) 和太古地產(962)，?家無嘢做炒緊相關新股。

追風逐影手快有

我睇睇機，卓悅(653) 再升9.1%創新高，莎莎(178)亦升5.5%，但係歐舒丹是化裝品股，有品牌，所以上市價貴啲有理由，因為市面無乜同類股份；而卓悅和莎莎只係做零售，並非有品牌，不過有時新股上市炒影子唔係咁理性，太理性唔使炒。

正如茶友所言，佢?家過緊的追風逐影的日子，明知佢係風與影，自然唔可以做人世，所以即使炒起來都唔使咁認真啦，手快有，手慢無，最緊要上落都快呀。

咁樣亦唔怪得太古升啦，佢將分拆太古地產上市，聽聞好多大家族對80年代上過市的太古地產好有印象，都會捧場咁話，太古地產招股價每股20.75元至22.9元，入場費4626元，昨日隻阿媽太古A(019)亦順勢高2%。