陸羽仁 - 資產股尋金記

評級機構標普下調希臘和葡萄牙主權信貸評級，搞到全球投資者有得震冇得瞓。歐美亞洲股市一個接一個冧檔，港股當然亦無運行，恒指連續第二天下挫逾 300點，收報20949點，大市成交略增至637億元。

港股美國預託證券ADR指數比港股收低620點，恒指跌幅其實已經好過好多人預期。不過中環茶友話，今日期指結算，結算前兩日的走勢唔作得準，若果結算日再抽高，反而要小心調整未完，結算完短線仲要回吓。

大摩調升恒指目標

不過美資和中資證券商都話調整係吸納機會。光大證券研究部唐焱話，數據顯示內地經濟不但已經踏入復甦期，中資類股的估值已進入吸引區，最起碼已進入價值區。

摩根士丹利發表研究報告，決定調高恒指今年目標價1.9%，由25,716點升至26 ,193點，潛在升幅23.3%，大摩仍偏愛金融及消費行業股份，新納入其焦點股名單包括港交所(388)及東方海外(316)，其餘還有佐丹奴 (709)、渣打集團(2888)、國泰航空(293)、中銀香港(2388)、電視廣播(511)及工銀亞洲(349)。大摩在跌市跳出來唱好，雖是微調，也是落注，要睇今次摩笛靈唔靈啦。

昨日大市焦點股都算係會德豐地產(049)啦，因為佢阿媽會德豐(020)宣佈，計劃將會德豐地產私有化，每股作價13元，私有化價格較09年年底的會德豐地產每股資產淨值13.45元，折讓約3.35%。會德豐地產近年起樓唔算活躍，但手上有不少優質物業，阿媽出得咁價錢私有化佢，自然知佢值更高價錢，由於出到13元收購，比之前有143%溢價，股東見好會收，估計通過私有化的機會唔細。結果會德豐昨狂升7.29元，收12.6元，升1.36倍。

盈大資產搬唔走

經紀張同絕大多數人一樣，無買會德豐地產，大呼走寶，問有無其他類似的好嘢。我話樓市升咗咁多，好多地產股(甚至內地的小型地產股都係咁)的市值相對於真實的資產淨值有好大折讓，問題係有折讓唔等如股價會郁。

我叫經紀張留意隻盈大地產(432)，呢隻嘢都有幾深折讓，而且大股東有啲動機去搞嘢。我早前都寫過盈大，佢可以話係單頭地產股，主要發展數碼港的住宅，即係最近影帝發哥去睇樓，一間屋要2億幾。盈大無負債，又無乜重大新項目發展，變成一個肥仔，早前宣佈豪派高息1.3元，宣佈前股價是2.2元，宣佈派高息後升到2.9元，?家都未除淨，突然爆單會德豐地產私有化，市場就憧憬佢都有少少機會私有化，昨日逆市升4.7%，收3.12 元。

盈大阿媽係電盈(008)，電盈控股股東係小小超李澤楷，早前李澤楷想私有化電盈，被法庭叫停咗，有排唔使再搞。小小超隔一重控住盈大，隔山打牛，唔係咁易郁到，咁呢個肥仔會點呢？有個中環茶友係睇地產價值專家，話佢都揸咗啲盈大防吓身，問佢點解唔怕坐艇，佢話盈大坐住幾十億資產，大股東搬唔走，佢放幾球落去睇吓，最壞情況可以同佢鬥命長，但係佢估小小超愛搞吓嘢，所以未來盈大有機會再派高息，甚至私有化。佢估盈大合理價值係5元，派完1.3元高息，除淨完應值3、4元，所以買來食咗佢啲高息，博佢除完息玩一排又上番除息前的價錢。呢個世界搵食方法人人唔同，在資產股中尋寶，都係一個方法。