青心直說：大行報告係股壇明燈?

資金在新一輪尋寶遊戲中由內房、內銀、汽車、家電股，速逃往醫藥、科技、零售等股份，大行報告繼續發揮推波助瀾作用。去年 12月，瑞銀將廣州藥業（ 874）評級由買入調低至沽售，認為當時股價已反映重組銷售隊伍因素，而股價短期內升逾四成，叫投資者見好識收。不過今年年初，大摩指廣藥在 60日內有八成機會上升，一句醫改有利表現，建議買入。摩笛一吹，誰與爭鋒，股價由 6.25元開始頭也不回，逢頂破頂。睇好廣藥總算事出有因，去年公司交足功課，盈利升 18.2%至 2.15億元，不過現價已升得太多，技術走勢亦不復過去幾個月勇猛，再追入有一定風險，所以大行都改為追捧科技股。
跟風買入轉身要快

與此同時，有大行自去年 9月開始，一直唱好同業唔再跟嘅精電（ 710）。公司一面被看好，一面卻在發盈警，剛公佈嘅業績又真係由盈轉虧蝕 2.68億元。但大行依然叫好，認為終止流動電話顯示屏業務屬正面消息，料資源將投放於高端汽車顯示屏，有信心大客現代汽車會帶嚟穩定定單。公司仲話打算進軍印度「電動車」顯示屏，同家居 3D立體放映顯示屏，新搞作符合晒市場要求嘅炒作概念，只等東風。不過大行報告、市場情緒及政策對股價影響，往往遠超合理估值。匹茲堡大學統計 97至 03年超過 4.4萬個大行報告嘅投資建議，同發表前後相關股份嘅股價，發現相關性僅 0.03%；但當報告嘅評級有變，股價會跟隨投資建議變動 4%之多。財經資訊爆棚，各大傳媒都爭相報道每日大行報告焦點，報告建議亦越嚟越大膽，有啲甚至每日公佈短炒策略，講明幾時止蝕幾時止賺。大行發功，投資者跟風買入無可厚非，但如果從未翻閱報告內容，身手唔夠快成為派貨對象就唔好話大行呃人，唔知點解，從來只有人輸咗錢鬧股評人，又唔見佢哋鬧埋大行，簡直係欺善怕惡。胡孟青